ZALEN, Nov. 24, 2024: Mizoram Snooker & Billiards Association (MSBA) buatsaih, Mizoram Snooker 6 Red Championship (2024-2025) final-ah Lalrina Renthlei chuan Lalsangzela hnehin a champion.

Inrinni tlaia race to 4 (frame li la hmasa chak)-a final khelhah Tuikhuahtlang tlangval, Lalrina hian Sangzela 4-1 a hnehin a champion a ni.

MSBA player chhuanvawr pahnih inhmachhawn hi a hmuhnawmin an inhnehtawk hle a. Lalrina hian frame hmasa pahnih chu 67-0 leh 62-1-a la zawnin a dinhmun a sawhnghet hmasa a. Khatla South tlangval Zela'n awlsam taka tlawm a tum bik lovin 49-0-in frame khat la velehin um a tum hle a; mahse, Lalrina hian 56-26-a fram lina a lak leh hnuah harsa angreng takin 31-28-in frame nganaa la leh ta a ni. 

Mizoram Snooker 6 Red Championship hi Thawhlehni tlai atanga MSBA Hall, Hawla Indoor Stadium, Republic Vengthlanga khelh tan kha niin Mizoram hmun hrang hrang atangin player 35 an tel a ni.