ZALEN, Nov. 22, 2024: Mizoram Snooker 6 Red Championship (2024-2025) khelh mek final-ah Lalrina Renthlei, Tuikhuahtlang leh Lalsangzela, Khatla South te an inhmachhawn dawn.

Mizoram Snooker & Billiards Association (MSBA) buatsaih championship semi final pahnih chu Zirtawpni tlai khan race to 4 (frame li hmasa zawk chak)-a khelh a ni a. Lalrina'n PB Liansangzuala chu 4-1-a hnehin final lut hmasa zawkah a tang.

Semifinal hnuhnung zawkah Sangzela hian 4-0-a Samson Lalnuntluanga hnehin final a lut ve bawk.

Final-ah hian MSBA player tha leh chhuanvawr pahnih inhmachhawn tur hi Inrinni tlai dar 4:00-ah khelh tan a ni dawn a, Explore Mizoramin an YouTube channel-ah live-in an pe chhuak ang.

Mizoram Snooker 6 Red Championship hi Thawhtanni tlai atanga MSBA Hall, Hawla Indoor Stadium, Republic Vengthlanga khelh tan niin Mizoram hmun hrang hrang aṭangin player 35 an tel a ni.