ZALEN, Nov 21, 2024: Mizoram Snooker 6 Red Championship (2024-2025) chu khel mekah Ningani tlai khan quarter finals khelh zawh niin semi final khel tur a chiang ta a, Zirtawpni tlaiah an khel zui ang.

Mizoram Snooker & Billiards Association (MSBA) buatsaih Mizoram Snooker 6 Red Championship quarter final-ah hian Lalrina Renthlei, Tuikhuahtlang; Lalsangzela, Khatla South; PB Liansangzuala, Dawrpui leh Samson Lalnuntluanga, Venghlui ten an tumpui theuh hnehin semi final an lut.

Race to 4-a khelh quarter final hian a rualin inkhel pahnih awmin a hmasa zawkah Lalrina'n Lalzawngkima chu 4-2-a hnehin semifinal a lut a, PB-a'n K. Lallawmkima chu 4-2 vekin a hneh bawk.

Inkhel hnuhnung pahnihah Samson-a hian Lalchhandama chu 4-3-a hnehin Sangzela'n Lalbiaksanga chu 4-0-a hnehin semifinal an inhawlh tling.

Semi final hi Zirtawpni tlaiah dar 5:00-ah Lalrina leh PB-a an inkhel ang a, tlai dar 6:30-ah Sangzela leh Samson-a te an inkhel dawn a. Inkhel pahnih hi Explore Mizoram-in an YouTube channel-ah live-in an tichhuak ang.

Mizoram Snooker 6 Red Championship hi Thawhtanni atang khan MSBA Hall, Hawla Indoor Stadium, Republic Vengthlang-a khelh tan niin Mizoram hmun hrang hrang aṭangin player 35 an tel.

Mizoram Snooker 6 Red Championship (2024-2025)

Semi Finals Fixtures Nov. 22, 2024 (Zirtawpni) 

5:00 PM: Lalrina Renthlei vs PB Liansangzuala

6:30 PM: Lalsangzela vs Samson Lalnuntluanga