ZALEN, July 26, 2025: Dawhkana ball hawlh hmanga inelnaah Lalrina Renthlei tluktu an awm thei lo. Mizoram State 8 Ball Pool Championship 2025-26 final-ah PB Liansangzuala chu 8-0-a sawpin nomawi a la leh ta.

Thawhtanni atanga khelh tan, Mizoram Snooker & Billiards Association (MSBA) buatsaih inelnaah hi Inrinni tlai khan final khelh hi niin race to 8 (frame riat chak hmasa sa chak)-a khelh niin Tuikhuahtlang, Aizawl tlangval hian Pb-a hi 8-0-in a hneh a ni.

MSBA season (April - March) kal mekah tournament pahnih awm tawhin Lalrina hi a champion ve ve ta a. Thla hmasa khan Mizoram 10 Ball Pool Championship-ah khan basketball a khelhnaa a ke tina chungin inlan chungin nomawi a lo la tawh bawk a ni.

MSBA Hall, Hawla Indoor Stadium-a inelna khelh zawh takah hian Mizoram hmun hrang hrang atangin infiammi 100 chuang an tel a, knockout-a khelh niin Zirtawpni tlai khan quarterfinal khelh a ni a, zanah semifinal khelh zui a ni.

MSBA hian Mizo Zirlai Pawl (MZP) nen tangdunin August 6-8 chhung hian Inter College 9 Ball Pool Championship 2025 an buatsaih dawn a, heta tel turte chu July 28 atanga August 5 chhung hian a thlawna khelhna hun an hawnsak dawn bawk a. He inelnaa tel tur hian zirna in pasarih an inziak lut tawh.