Mizoram Snooker & Billiards Association (MSBA) buatsaih, Mizoram State 9 Ball Pool Ranking 2024-2025 chu Inrinni zan khan final khelha zawh a ni a, Lalrina Renthlei, Tuikhuahtlang chuan Lalsangzela, Khatla South hnehin a champion.

MSBA player tha pahnihin final an khelh hi ‘Race to 9’-a khelh niin an inhnehtawk hle a. Frame an inlak chhawk zak zak hnuah Lalrina hian 9-6 (frame 9 - frame 6)-in hnehna a chang ta a ni.

Champion leh runner up hian medal, certificate leh pawisa fai an dawng a. Semi finalist pahnih, K Lallawmkima leh R Lalthazuala te pawh lawmman pawisa fai hlan an ni.

Mizoram State Sports Council (MSSC)-in an sponsor Mizoram State 9 Ball Pool Ranking 2024-25 hi Thawhtanni atanga MSBA Hall, Hawla Indoor Stadium, Republic Vengthlanga khelh a ni a, Mizoram hmun hrang hrang atangin player 40 chuang an tel a ni.