Aizawl: Mizoram State Legal Services Authority chuan victims of crime compensation hnuaiah zangnadawmna Rs. 3.19,57,000 a pechhuak tawh.   Mizoram State Legal Services Authority thawktute hnen atanga thudawn danin zangnadawmna an pek chhuahte hi POCSO hnuaia vanduaina tawk mi 80, pawngsual tura mi 26 leh sualna dang avanga tuartu mi 40 te an ni. Mizoram State Legal Services Authority hian kum 2012 atangin victims of crime compensation hnuaiah hian tanpuina/zangnadawmna hi an pe tan a, he cheme hnuaiah hian BPL chhungkuate chu vanduaina an tawhin zangnadawmna hi an dil thei a, an case a zirin pawisa pek theih zat hi a inang lo a ni.   Mizoram State Legal Services Authority thawktute chuan vanduaina tawkte chu thla 6 chhung ngeiin anmahni bialtu District/Mizoram State Legal Services Authority-ah thlen tur a ni tiin hemi hun chhunga an hman lo a nih chuan an tlai chhan chiang taka sawiin dilna a thlen leh theih niin an sawi a. He scheme hnuaia tanpuina dilte chu an pe nghal mai lo nia sawiin Police, dan lam thiam leh Doctor te nen uluk taka an enfiah hnuah chauh tanpuitlak an nih chuan an tanpui thin tih an sawi. Tanpuina dil zingah dawtsawi pawh an manchhuak fo tih sawiin hmeichhe thenkhat, an bialpa/kawppuite nen inthuruala pawngsual anga dawtsawi manchhuah pawh an awm niin Zalen an hrilh bawk.   Victims of Crime Compensation hnuaiah hian tanpuina dawn theih zat hi an case a zirin a inang lo hle a. Pawngsual tuarteah nuai 2 thleng an pek theih laiin kum 12 hnuai lamah chuan nuai 3 thleng an pe thei nia thudawn a ni.