Mizoram Snooker & Billiards Association (MSBA) buatsaih, Mizoram State Snooker Championship 2024 chu Inrinni zan khan MSBA Hall, Hawl Indoor Stadium-ah zawh fel a ni ta a, Lalrina Renthlei a champion.

Mizoram State Snooker Championship 2024 final-ah hian Lalrina, Tuikhuahtlang leh Lalsangzela, Khatla South te an inkhel a, race to 4-a khelh niin frame li la hmasa zawk, Lalrina hian 4 - 1-in hnehna a chang ta a ni.

Mizoram champion ni thar, Lalrina hi Snooker Ranking-ah Mizoram No. 1 ni mekin, Lalsangzela hi No. 3 a ni mek thung.

Championship 2024-ah hian player 29 a tel a, Aizawl khawpui pawn atangin player pahnih a tel a. March 4, 2024 atanga khelh tan kha a ni.

MSBA hian Hawla Indoor Stadium-ah hall neiin cue sport ngainatute tan theihtawp a chhuah a. Pool leh Snooker-a tuite tan Pathianni tih loh, ni tin chawhnu dar 1:00 atanga zan dar 9:00 chhungin a duh apiang tan inkhelh theih turin a hawng a, mi pakhat tan ni khatah Rs. 50 lek chawiin a khelh theih reng a ni.

Pool leh Snooker-ah hian hmeichhia bakah mipa kum naupang lam khel a tam lo va, national level khelh theihna kawng zau tak a la inhawng a ni.