Aizawl May 23, 2024 : Suzuki Motorcycle India Private Limited (SMIPL) chuan Mizorama an chet that avangin Brigade Field, Bawngkawn, Aizawl-ah Mizoram Gixxer Day an buatsaih, free servicing te an ti nghal bawk a ni.

Vawiinah SMIPL Division Manager Miyaji San chuan a hawng a, Mizoram Gixxer Club T-shirt tlangzarh nghalin Mizo mipuiin Gixxer mai bakah Suzuki siam lirthei ke hnih nei an ngaihhlut avangin lawm thu a sawi a, anmahni dawrtute tan a tha thei ang bera hma laksak zel an tum tih sawi bawkin nuam ti taka hun hmang turin duhsakna a hlan a ni.

Japanese Miyaji San nen company lam atangin mi pangain Gixxer Day an hmanpui a, kum 10 chhung Gixxer bike nei tawhte thilpek hlanin 2017-a din Mizoram Gixxer Club-in mumal taka ke a pen bawk avangin an ngai hlu a, chuvangin Gixxer Day an buatsaih a, mipui tam zawkin Suxuki lirthei an hmelhriat theihna remchang a nih an beisei bawk.

Mipui eng emaw zat an pung khawm a, Carnival, a duh apiang tel theihna tur inelna chi hrang hrang, bike stunt show, cosplay leh concert an huaihawt a ni, a hmunah hian free servicing an customer te tan an tih sak nghal bawk a ni.

2014 khan LBS Suzuki-in Mizoramah Suzuki two-wheeler dealership a hawng a, kum 10-na hmang mekin hetih chhung hian hma an sawn nasa a, India rama dealer 500 chuang zingah nikum December khan hralh tam ber an ni a, tun thla kal mekah hralh hnem ber an ni leh mek bawk a, 2023 chhungin an hnuaia sub-dealer-te hralh tel lovin thla tin chawhrualin 850 vel an hralh a ni.

LBS Suzuki Managing Director H Ngurdingliana Ngurte chuan Mizo mipuiin an thil zawrh an hlutsak avangin hetiang dinhmun hi thleng thei an nih thu a sawi a, mipui vantlang tan malsawmna ni ve tur pen chhuah chu an bat a nih angin hun lo kal zelah nasa zawka ke pen an duh tih a sawi.