ZALEN January 20, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan "Ashtalakshmi Darshan Youth Exchange Programme" kaltlanga Mizoram rawn tlawhtu Andaman and Nicobar Islands leh Lakshadweep atanga zirlai 40 leh zirtirtu 4 te chu Durbar Hall, Lok Bhavan-ah a kawm a, Mizoram chu India rama state ralmuang ber a nih thu a hrilh.

Larsap General (Dr) Vijay Kumar Singh chuan Mizoram rawn tlawhtu zirlaite chu a lo lawm thu sawiin, India hmarchhak state-te hriat chian lehzual nana hman tum turin a fuih a. Mizoram chu an rawn kalna Andaman & Nicobar Islands leh Lakshadweep ang bawka mihring cheng tam lohna leh hmun mawi tak, industry lian awm lohna leh ramngaw nei tam a nih avanga sik leh sa nuam tak a nih thu a hrilh a. Mizoram chu ziak leh chhiar thiam vekna state-a puan a nih thu hrilhin, National Education Policy 2020 inkaihhruaina zulzuiin State University a neih dawn thu a hrilh bawk.

Larsap chuan 1986-a Mizoram Peace Accord ziah a nih hnuah Mizoram chu India rama state ralmuang ber a nih thu a hrilh a, hmasawnna pawh chak taka kal chhoh mek zel thu a sawi a. Nikum-ah Bairabi-Sairang railway line hawn a nih thu sawiin, Mizoram chhim tawp thleng railway line siama Kaladan Multi-Modal Transit Transport Project (KMMTTP) nena thlunzawm tum a nih thu a hrilh a. Mizoram chuan agriculture, horticulture leh ram hmul damdawiahte theihna nasa tak a neih thu sawiin, supply chain leh hralhna tha a awm phawt chuan hmasawnna nasa zawk a thlen theih thu a shrilh bawk a. Zirlaite chu Mizoram an cham chhunga hun hlimawm leh hlawkthlak tak hmang turin duhsakna a hlan a ni.

Ashtalakshmi Darshan Youth Exchange Programme hi hnam inpumkhatna chawilar nana Sawrkar laipui hmalakna, DoNER Ministry hnuaia kalpui a ni a. Hemi programme hmang hian hmarchhak state leh India ram hmun danga zirlaite chu hnam ziarang leh nunphungte zirin an intlawhpawh thin a ni.

Ashtalakshmi Darshan Youth Exchange Programme hmanga Mizoram rawn tlawhtute hian January ni 15, 2026 khan Mizoram an lo thleng a. Mizoram University-ah innghatin an cham chhung hian mithiam te'n North East India chanchin an zirtir dawn a. Ruahman dan chuan January ni 28, 2026 hian Mizoram an chhuahsan ang.