Aizawl: November thlaa Bru laklet tur chung chang sawihoin Zirtawp ni khan Kanchanpur Dak Bangla-ah Mizoram, Tripura leh MBDPF (Mizoram Bru Displaced Peoples Forum) hruaituten inkawmhona an nei. Bru hruaikir turte hi Relief Camp ah endik hna thawh phawt tura ruahmanna awmsa chu pawm tlan a ni a, camp hrang hrang 6 ah te hian Mizoram atanga Identification team ten zing dar 9:30 tangin endik hna hi an thawk thin dawn a ni. Sawrkar Officials pahnihte hian Repatriation chungchanga thil hriat tur pawimawh leh Intelligence thilah inpawh taka information in hrilh hre thin turin leh lungrual taka thawhho nise an ti a. Mizoram atanga official duty te venhim hna chu Tripura sawrkar buaipui tura tih a ni. Reang (Bru) Relief Camp a awmte hi E/Roll 1995 hmanga endik tur a ni a, Roll a hming chuang lo te chu thuang hnihna ah endik an nih dawn thu leh Repatriation tanpuina dawng tawh te tan a dawn nawn theih dawn loh thu meeting-ah hian tarlan a ni bawk. Endik hna zawh a nih hnu hian hruaikir hna hi November thla tawp lamah thawh tura ruahman a ni a. Hetih rual hian MBDPF hruaitute chuan hruaikir an nih hma hian an thil phut hrang hrangte tih-hlawhtlinsak an phut thu meeting-ah hian an sawi a, sawrkar Officials te chuan Ministry of Home Affairs (MHA) thuchhuak leh Road Map anga Repatriation hi kalpui an nih avangin an thuneihna ngaihchan a ngaihthu leh an harsatna erawh lo thlensak an tum thu an sawi. He meeting-ah hian GoM aiawhte hi Lalbiakzama, Addl. Secretary (Home) leh Lalbiaksangi D.C Mamit ten an ho a. Tripura sawrkar aiawh te leh MBDPF atangin President A. Sawibunga, Bruno Marsha leh R.Laldawngliana te an tel.