ZALEN March 16, 2026: Vawiin khan Assembly Annex Conference Hall-ah Assembly House Session chhun chawlh laiin Chief Minister Lalduhoma chuan kum 2026-27 sawrkar kum chhunga kalpui tur Mizoram Universal Health Care Scheme 2.0 leh MUHCS Call Centre a hawng. Health Minister Lalrinpuii chu khualzahawm a ni a, Speaker, Minister, Adviser to CM leh MLA eng emawzatten an telpui.

Chief Minister chuan, Mizoram Universal Health Care Scheme chuan kum hnihna alo chuangkai ta a. Tluang taka he scheme a kal theih nana tha leh zung sengtu zawng zawng te leh MUHCS zawmtu hospital-te chungah lawmthu a sawi a ni.

Lalduhoma chuan, "MUHCS kum khatna kha uluk takin kan zir a, sum leh pai pawh kan seng nual a. Nimahsela mipuite tana a thatzia kan hmuhin sum leh pai senso hi tam tham deuh mahse insen zel kan huam. Tun budget tharah hian Rs. 130 Cr. kan dah a, sawrkar hnathawk contribution hi Rs. 26.42 Cr vel a ni a, Asian Development Bank atangin Rs. 800 Cr chuang kan puk bawk a. MUHCS 2.0 hi a hma aia tha zawka kalpui kan tum a ni," a ti.

Mipuiten inziahluhna hun hawn mek hi bawh pelh lo ila, hun bituk pawn lamah inziahluh theih a nih loh avangin a hunbi hi ngaipawimawh ang u, a ti.

Inziah luh hun hi April ni 15, 2026 thleng hawn tur a ni a, May thla khar a ni ang a, June thlaah thla khat chhung “Grace period” hawn leh a ni ang. Grace period-a inziah luhna man erawh chu hun pangngaia inziah luh man aiin zaa sawmnga (50%) in a sang tawh ang.

Chief Minister hian, "MUHCS kan kalpui mek danah emergency emaw nunna atana hlauhawm enkawlna pek kawngah empanelled damdawiin ni lova inenkawl theihna (provision) siam a ni a. He dan hi kan ennawn a MUHCS 2.0 ah hian khauh zawka kalpui kan tum.

1) ICU a admit nghal ngai damlo

2) Nunna chhan nana zai nghal ngai damlo

3) Accident vanga zai nghal ngai damlo te chauh hi MUHCS hnuaia emergency/life threatening provision-in a huam tawh dawn a ni," a ti.

Chief Minister hian Mizoram Universal Health Care Scheme hnuaia inziak lut damdawiinte hnena bill pek chhuah hi khaih lak awm lovin tluang taka kalpui a ni a. A inkaihhruaina danin 'thlatin pek chhuah tur' a tih laiin sawrkar chuan kartin a pe chhuak thei a. Hei hian sawrkarin Universal Health Coverage a dah pawimawhzia leh sum leh pai dinhmun tha tak hnuaia kalpui a nihzia a tarlang a ni, a ti bawk.

MUHCS 2.0 hi April ni 1, 2026 atanga kalpui tan a ni ang.