All Mizoram Village Council Association (AMVCA) te chuan Chief Minister hnenah thingtlang lam ei leh bara an that theih nan rawtna an thlen a, MGNREGS tun aia tangkai zawka kalpui a nih theih dan rawtna an thlen bakah Covid 19 hripui leng laka invennaah thingthlang lam chu kaihhruaina a bikin siam an duh thu an thlen bawk a ni. MGNREGS chu party worker invulhna tur a nih loh thu leh VC/VEC leh mipui rawn loa DRDA leh BDO office atanga material component hna kalpui a ni thin nia sawiin chu chu tihtawp an phut bawk a. AMVCA te chuan MGNREGS kalpui a nih mek dan chu dan kalh a nih avangin siam that a nih loh chuan Sawrkar chu Court ah khin an tum thu an sawi bawk.

VC intelkhawm pawlin thingtlang economy chawikan dan tur an thlen thenkhat hi dan chhung ami a nih chuan ngaithah chi a ni lo a, a theih hram chuan tihhlawhtlin sak pawh a awm viau bawk a ni.

Hripuiin min nuai loh lai pawh nise MGNREGS hi thingtlang lam tan chuan sum hnar tha tak pakhat a ni a, thui tak indawm kan nana an rin a nih avangin hripui len laia hetiang thu a lo lang ta hi a pawi hle a. Mizoram VC intelkhawm te'n a pawl angin CM hnenah an thlen a ni a, tuna MGNREGS kalpui a nih danah hian dan pel a awm a rinawm rum rum a ni. He scheme hi inkaihhruaina felfai tak nena hman tura duan sa a ni a, sum hmanna tur pawh duan sa a ni thin bawk a ni. Khawtlang leh VC remtihnain hmun thenkhatah chuan tlem siam rem te pawh a awm tawh thin a.

Mizoram VC intelkhawm pawlin an duhloh ber nia lang chu party worker te invulh nan MGNREGS componenent material sum chu mimal hna anga kalpui a ni a, hei hi party worker te invulhnaah an ngai bawk a ni. An thu hi a dik a nih chuan bihchian ngai tak niin a hriat a, hai chhuah vata thil dik lo ti thin te chungah pawh hmalak a tul ang. Eng pawh nise, thil awm dan sawrkar lam pawhin a sawifiah vat chu a tha awm e.

Mihring chevel an awm chhung chuan Covid 19 hripui hian hmun kilkhawr pawh a luhchhuah zel dawn tih a lang mai a. Tun dinhmunah phei chuan hripui hluarna phai atangin kan unaute an rawn haw ruih ruih a ni a, district hran hranah khung hran an ni a, hei hian kan him tihna a kawk loa engtik lai pawha palh thleng thei a nih avangin zan hnih khat thil thuah dinhmun a danglam dawrh thei reng thu kan mithiamte'n an sawi fo a ni. Tuna sawrkarin kan awm dan tur a sawi hi kan nitin nunah zawmin he hripui karah hian nun kan zir a ngai zawk a, 'inhlat chunga hnathawh' te pawh tih theih vek a ni a, lockdown khauh taka kalpui a nih lai pawhin loneitute chu an chetvel phalsak an ni zawk a ni.

Khawpui leh thingtlang dinhmun a inang lo hle a, Covid 19 chungchangah hian thingtlang tana a hrana inkaihhruaina siam hi hetia han ngaihtuah mai chuan tha tak angin lang a, bengsika ngaihtuahna hman erawh a ngai dawn a ni. Inkaihhruaina hran siam a nih dawn pawhin mipui thawhchhuah tur ngaih pawimawh a nih rualin mipui himna a pawimawh hle tih rilruah dah len erawh a tul khawp ang.