ZALEN January 10, 2026: India-Taiwan Labor Mobility agreement 2024-hnuaia a hmasaber/pilot atan Mizo thalaite Taiwan a hnathawk tura hmalakna chungchangah Vice Minister Ministry of Labor, Taiwan, Taiwan Ambassador leh official dang an vaiin mi 10-te chu Aizawlah zan khat riakin nimin khan an lo kal.

MYC office-ah January 9, tlaiah meeting neih niin Meeting hi Malsawmzuala Ralte, Chairman MYC-in a kaihruai a. Jonathan Lalremruata, OSD to CM leh LESDE aiawh an tel bawk.

Taiwan minister chuan Mizoram chu ei leh in, hmel, hnam lam leh nunphungah inang a tih thu sawiin, Taiwan-a awm ang maia an tlangnel thu a sawi a. Mizo thalaite pawhin Taiwan nuam an tih ve ngei an beisei thu a sawi bawk.

Taiwan a hnathawk duh thalai 300 chuangin MYC-ah dilna an thehlut a, a thawh khatna hi March thla chhung a tifel hman tura ruahmanna siam a ni. Manufacturing industry a thawk tur an ni dawn a.

MYC hian TECC/Taiwan Economic & Cultural Centre nena tangkawpin, Mizo thalai Taiwan-a hnathawk a kal turte pualin training hrang hrang MYC office-ah nei turin ruahmanna te siam a ni bawk. 

Taiwan Vice Minister team hian CS leh CM te an chenna inah hmuin, thalai hnathawk tur thawn bakah disaster Management and mitigation, agriculture/horticulture, badminton, solar, electronics-ah te la thawh ho zel ni se tiin ruahmanna siam a ni bawk.