Aizawl August 29, 2024 : Mizoram Lokayukta leh MJA Lunglei chuan vawiin khan YMA Sub. Hqrs. Conference Hall, Lunglei-ah Anti-Corruption Awareness Campaign an buatsaih a, he huna thusawitu Mizoram Lokayukta member Joel Joseph Denga, MJS (Rtd) chuan Mizoram chu Zero corruption state a siam tura pui turin kalkhawmte a sawm.

Mizoram Lokayukta Member Joel Joseph Denga, MJS (Rtd) chuan thu tawi sawiin, "Mizo Kristiante hian hlemhletna leh eirukna kan nunpui chuan Pathian malsawmna kan beisei thei lovang. Pathianin dan zawm turin min duh a, chu chu hmuingilna a ni, taxation leh police checkgate motor lut ten thamna an pek a ngaih si chuan coruption chungchangah enge sawi theih kan neih. Civil case neih tam tak hi Land Revenue ten dikna an tlakchham vang a ni tiin hei hian hmasawnna a ti thuanawp a ni. Mizoram hi Zero corruption state a siam turin min pui rawh u," a ti.

Mizoram Lok Ayukta Public Prosecutor R. Laltharliana pawhin thu sawiin, Sou-moto power an neih thu leh eiru nia hriat chu an chhui nghal theih tih a sawi a, "CBI ko lut turin stàte phalna lak kher a ngai lova, Lokayukta hian thuneihna a nei. Mizorama corruption awm chhan ber pakhat chu eirukna kan ngaihsak tawk loh vang te, langtlang awm loh vang te leh duham vang te a ni. Corruption do turin mitin a sawm a, engtiklai pawhin zualkona a thlen theih a, a tul chuan an hming kan thup sak thei a ni," a ti .

Tender chhuah lova hna pek, sawrkar tanpuina dawng a hnathawk tha lo te pawh an chhui thei tih sawiin mitin eirukna do turin a sawm.

He hun hi Mizoram Lokayukta Chairperson Lalmalsawma, IAS (Rtd)chuan kaihruaiin Lunglei DC R. Lalthazuala, IAS chuan kalkawmte lawmna thu a sawi.