ZALEN February 25, 2026 : Zoram Medical College and Hospital, Falkawn ah Ril leh Pum lam (Gastroenterology) zir hona leh Surgical Workshop chu niminah khan neih a ni a. He workshop hi Department of Surgery, ZMC&H leh Association of Surgeons of Mizoram te tang hoa buatsaih niin, Mizoram-a a hmasa ber turin Pancreas Cancer chu Verh (Laparoscopy) in zai a ni.

Gastroenterology zirhona ah hian Manipal Hospital, Salt Lake, Kolkata atanga lo kal Doctor-ten Pancreas Cancer hi an khawih a. Dr. Benjamine Khiangte, Medical Gastroenterologist (Gastro & Liver Clinic) nen tang hoin Endoscopic Ultrasound (EUS) chu a mamawh damlo mi pariat tan a thlawn veka tihsak an ni bawk. EUS hi sorkar hospital-ah Mizoram ah kalpui vawikhatna a ni bawk. ZMC&H doctor-te chuan EUS khawl chu khawl tangkai tak a nih thu leh Mizoram pawna damlo thenkhat refer ngaih chhan a la nih avangin mipui tam zawk banphaka sorkar hospital-a neih ve theih hunah chuan harsatna tam tak a sutkian ngei an beisei thu an sawi.

He hun hi Prof. Zoramthara Zadeng, Director-te, Prof Lalnunmawii Sailo, Medical Superintendent leh Prof C. Vanlalhlua (Sub Dean, Hospital)-ten telpuiin, Manipal Hospital lam atanga mikhual te lawmna thu a sawi a. MUHCS hnuaiah damlo ten man chawi lovin engkim an tih theih phah thu a sawi bawk.

Workshop hi zan lamah CME (Seminar) in a chhunzawm a. He hunah hian Gastroenterology lama hmasawnna leh Mizoram hmachhawp te sawihoin, he hun hi Dr. Samuel Lalhruaizela, Associate Professor chuan a kaihruai a. Prof. John Lalliandinga HOD, Dept of Surgery ZMCH chuan kalkhawmte lawmna thu sawiin, Mizo-ram Surgeon hrang hrangte leh ZMCH lama doctor hrang hrangin an telpui a ni.