All Mizoram Inter-Village Band Contest 'SEKI' 2022 chu Zirtawpni zan khan zawh fel a ni ta a, Open category-ah Serkawn Village Council Band te an thiam ber a, Under 19 category-ah Dinthar Local Council te pakhatna an ni bawk. SEKI 2022 pakhatna lawmman hi Mizoram Youth Commission chairman Dr Vanlaltanpuia'n a hlan a ni.

SEKI 2022 pakhatna hi Serkawn VC Band, Lunglei te niin, pahnihna hi Chanmari West LC Polyshere an ni a, pathumna chu Electric Veng Local Council Band, Aizawl an ni bawk. SEKI - Inter Village Band Contest hi 2019 khan ṭan tawh niin, hripui vanga chawlh lailawk a nih hnuin kuminah chhunzawm leh a ni a, mipuiin an hlut hle.

Niangani zan leh Zirtawpni zan khan result puan a ni a, concert ropui tak a awm bawk. Intihsiak hi Vanapa Hall-ah neih a ni a, hall khatin mipui an pung khawm thei ziah - Mizo thalai ten rock music an ngaina tih hai rual a ni lo. Result puan zan hian Vanapa Hall-a leng lo khawp an pungkhawm a, a hmunah mipui an sahawk a ni ber!

Open category-ah hian band tha tak tak an inlan a, chung zinga che tha zualte chu  - Chanmari West LC, Chanmari West LC Polysphere, Electric Veng LC, Ramthar Veng LC leh Serkawn VC, Lunglei te an ni. Top 5 te hi July 5 zan khan an intihsiak a, a tawpah Serkawn Village Council Band te an thiam ber a ni. Pakhatna hian Rs. 1,00,000 + citation + trophy an dawng a, pahnihna leh pathumna ten Rs. 30,000 leh Rs. 20,000 bakah citation an dawng a ni. 

Open Category Result 
1.  Serkawn VC - Rs. 1,00,000+citation +trophy
2.  Chanmari West LC Polyshere - Rs. 30,000+citation
3. Electric Veng - Rs. 20,000+ citation

Mimal lawman 
Best Vocalist - Lalremruata, Ramthar Veng LC
Best Guitarist - Gabriel Lalhmangaihzuala 
Bassist - Lalhmangaihzuala, Chanmari West Polyshere
Best Drummer - R. Vanlalzawna, Serkawn VC Band
Best Keyboardist - Lalrinsanga, Electric veng LC

Under 19 winner Dinthar LC
SEKI 2022-ah hian Under 19 bikah Dinthar LC te hi pakhatna an ni a, 25000 + citation + trophy an dawng. Pahnihna hi Chhinga Veng LC te an ni a, anni pawh hi winner ni thei kawpin an che tha mahse vanduai zawkah an tang. Ramhlun South LC te chu pathumna an ni a, pahnihna leh pathumna te hian Rs. 15,000 + citation leh Rs. 10,000+ citation an dawng a ni - top 3-a lang band te that zia hmuh hmaih chi a ni lo.

Under 19 bikah hian mimal lawmman hrang hrang sem nghal a ni a, Dinthar LC leh top 3-a lang phak lo Ramthar LC te an langsar. Best Vocalist hi Fedric Lalthanpuia a ni a, Best Drummer atan Lalfamkima thlan a ni bawk - anni hi Dinthar LC a mite ve ve an ni. Ramthar Veng LC te top 3-ah lang pha lo mah se mimal lawmman pahnih an humhaw a, talent an neih that zia a lang. 

Under 19 Result 
1. Dinthar LC - Rs. 25000 + citation + trophy
2. Chhinga Veng LC - Rs. 15,000 + citation
3. Ramhlun South LC - Rs. 10,000+ citation 

Mimal lawmman latute :
Best Vocalist - Fedric Lalthanpuia, Dinthar LC
Best Guitarist - Joseph Lalchhandama, Ramthar Veng LC
Best Bassist - C. Lalruatfela, Ramhlun South LC
Best Drummer - Lalfamkima, Dinthar LC
Best Keyboardist - Manase Lalrohlua, Ramthar Veng LC