ZALEN September 12, 2025: Social Welfare Department chuan zirchianna an neih hnuah Aizawl Venghnuai chhuak Lalneihsangi, Pi Buangi tih a koh, tuna Khatla a cheng chu Mizo damlai zinga upa ber atan naktuk chawhnu dar 3:30 hian Social Welfare Minister Lalrinpuii chuan a puang dawn.

Pi Buangi (Lalneihsangi) hian April ni 14, 2025 (Thawhtanni) khan kum 108 a tling a, kum 109 a hmang mek a, Social Welfare Department chuan an zirchianna atangin Mizo damlai zinga upa berah ngaiin upa berah hian an puang dawn a ni. 

Pi Buangi hi Aizawl Venghnuai a piang leh seilian niin; an chhungkua hi Salvation Army zawm hmasate zinga mi niin; a pa chu Thangchhunga CSM, Mizorama (Kohhran Upa) Corps Sergeant Major hmasa ber a ni. 

Pi Buangi hi Rev. Sena (L) nen Salvation Army Officer an lo ni tawh a. Mizo zinga Rehab a thawk hmasa te zinga mi a ni a, Behala Girls Home Kolkata a hmeichhe rahbi tleu leh naupang paih te enkawlna hmunah a thawk thin. Talent tha tak a nei a, Puan thui, puan tah leh la phiar a thiam a, ṭawng chi hrang 5 a thiam bawk. 

Kum 2022 khan Heritage Award buatsaih Mizo Hmeichhe Chhuanawm "Women of Substance" hlan a lo ni tawh a. Aizawl Municipal Corporation (AMC) chuan kum 2024 khan Aizawl khua leh tui a upa ber nihna chawimawina a lo hlan tawh.

Tunah hian a makpa H.V Lalringa I.A.S Rtd. te In, Khatla ah a cheng mek a. Ebenezer Corps Venghnuai-ah a lawi a ni.