Aizawl April 14, 2023 : Irrigation & Water Resources Department (IWRD) Minister C. Lalrinsanga chuan vawiin khan PMKSY-Har Khet Ko Pani project kaltlanga siam, Mizorama buh leh thlai chawm nana leihnuai tuiverh hmalakna hmasa ber tur, Tuipui (Mualbuhvum) Ground Water Irrigation Project (GWIP) chu Champhai leilet Mualbuhvum hmunah a hawng.

C. Lalrinsanga chuan Champhaia loneitute mamawh tak leihnuai tui verh hlawhtling taka zawhfel leh hawn a ni ta chu lawmawm a tih thu a sawi a. Pradhan Mantri Kisan Urja Suraksha evam Utthan Mahabhiyan (PM KUSUM) kaltlangin hmun hniam zawk atanga hmun sang zawka nizung chakna hmanga tui pump chhuahna, Solar Water Pump kalpui tura hmalak mek a nih dan te a tarlang bawk.

Khualzahawm H& FW Board Vice Chairman Dr. ZR. Thiamsanga, Champhai North bialtu MLA chuan Mizorama leihnuai atanga tuiverh chhuahna Ground Water Irrigation Project hmasa ber Champhaia hawn a ni chu lawmawm a tih thu leh a hlawhtlin theih nana Minister leh Department lama thawktute hmalaknaah lawmthu a sawi. Ram leilung hausakna hai chhuak turin technology neih te chhawr tangkai thiam a tul a ni, a ti. 

Tuipui (Mualbuhvum) Ground Water Irrigation Project atana sum ruahman hi cheng nuai 99.10 a ni a. DPR hi Central guidelines leh norms hmanga siam a nih vangin tui verhna leh tui pump chhuahna bakah tui sem darhna tur canvas pipe 200 rm te hi project component tlangpui chu a ni. Tuipui GWI project-ah hian tubewell sawm panga (15) verh a ni a, heng tubewell sawm panga (15) te hi Solar pump pali (4) leh electric pump sawm pakhat (11) te hmanga tui lak chhuah a ni. Heng tubewell sawm panga (15) zinga paruk (6) te hi Department drill rig hmanga verh a ni a, a dang pakua (9) te hi private driller-te verh tir an ni.

India ram hi khawvel puma leihnuai tui tling (groundwater) hmang nasa ber a ni a. Groundwater hman nasatna ber chu irrigation sector niin groundwater hman zawng zawng atanga 89% chu irrigation atan hman a ni. Mizoramah chuan irrigation atan groundwater hman a la ni meuh lova, Groundwater Irrigation Project 13 Mizoram hmun hrang hrangah a vawi khat nan kalpui mek a ni.