ZALEN December 24, 2025 : Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan feet 108-a sang, Mizorama India hnam puanzar sang ber hawnna hun, 34 Assam Rifles, Zokhawsang, Aizawla neih chu khuallian ni a hmanpuiin a pawtpharh. He hunah hian Home Minister K. Sapdanga pawh a tel a ni.

Hemi puala thu a sawiah Larsap General (Dr) Vijay Kumar Singh chuan Mizorama hnam puanzar sang ber hawn a ni chu chhinchhiah tlak a tih thu sawiin, Mizote hunpui Krismas urlawk ni a hawn a ni lehzel chu a inhmeh a tih thu a sawi a. A buaipuitu Assam Rifles leh Flag Foundation of India te’n Zokhawsanga Assam Rifles hmun an thlang chu an tifuh a tih thu sawiin, he hmuna hnam puanzar thlawk delh delh hi Aizawl atangin a langsar hle dawn a ni, a ti bawk.

Larsap chuan hnam puanzarin mipuite inpumkhatna tichak lehzual se a duh thu sawiin, hei hian India Danpui inghahna - inlungrualna, inpekna, mawhphurhna hlenchhuah leh hnam ziarang chawisan pawimawh zia min hriatchhuah tir zel se a duhawm hle ang, a ti a. India chakna chu a chhunga cheng mipui inang lo tak takte lungrual taka an chen zana hi a ni tih sawiin, hnam puanzar chu Viksit Bharat 2047 lamhawia tan la tura Mizoram thalaite chawk phurtu a nih a beisei thu a sawi bawk.

Thu sawitu dang Home Minister K. Sapdanga chuan hnam puanzar chuan inpumkhatna, ram hmangaihna avanga mahni inphatna leh ram hmalam hun eng tak beisei tlatnate a lantir tih sawiin, India-in zalenna a sual lai hun mipuite rilrua hriat nawn tir leh theitu a ni, a ti. Hnam puanzar hawn tak chuan mipuite thinlungah ram hmangaihna a tuh dawn thu a sawi bawk.

Mizorama hnam puanzar sang ber pawhpharhna hunah hian Major General Ashim Kohli, SM, Chief Executive Officer, Flag Foundation of India pawhin thu sawiin, Naveen Jindal, Chairman, Flag Foundation of India chuan video kaltlangin thu tawi a sawi a. Brigadier Pushpendar Sorayan, DIG, Headquarters 23 Sector Assam Rifles chuan lawmthu sawiin hun a khar a ni.