ZALEN Sept. 27, 2024; Mizoram a khaw te ber, Vuakmual, Lunglei dist. - ah chhungkaw pakhat Pu Tawnga te chhungkua chiah an khawsa mek.

An khaw thenawm Zawlpui khua atanga ZALEN thudawn danin, Vuakmuala khawsa mek, Pu Tawnga te chhungkua hi member 7 vel an ni a, tlang chhip a awm khua niin, motor tlawh pawh loh khua ni.

Thu lakna in a tarlan danin, Vuakmual hi Lunglei District a awm niin, tunhma deuh chuan In 40 bawr vel te an cheng thin. Rambuai khan Lungsenah sawi khawm niin kum 1974 ah an khuaah hian an let leh a, amaherawhchu, harsatna hrang hrang avangin kum 1988 khan a nawlpuiin khua hi an chhuahsan.

A nawlpuiin an chhuahsan hnuah pawh chhungkaw tlemte cheng zuiin, kum 2007 Mau Tam lai vel pawh khan chhungkaw 8 an la khawsa.

Amaherawhchu, tunlai khawvel changkang zelah motor kawngin a pawh loh Kawlphethain a thlen phak lohna hmuna khawsak chu a harsat zual tak em avangin a awm chhunte pawh hian an chhuahsan leh a. Kum 2017 atang khan tuna la awm chhun, chhungkaw khatte hian an luah zui ta a ni.

Thuampui, Putlungasih leh Zawlpui lam atangin kein tlawhpawh theih ni mahse, kawng a awm mumal tawh lova. Chho zawngin ngaw hnuaiah a loh berah Km. 4 vel kal a ngai.