ZALEN May 17, 2026: Hmeichhia leh naupangte himna atana mi phur chi lirthei zawng zawnga vuah vek tura tih, Vehicle Location Tracking & Emergency Alert System (VLTS) chu Mizorama lirthei 2,284-ah vuah a ni tawh.

Transport thawktute sawi danin VLTS khawl hi lirthei passenger phur chi motor - taxi, maxi cab, bus leh rental-ah te vuah vek tur a ni a, lirthei lei thar hnenah vuah nghal zel a niin lirthei hlui tawh deuhah erawh vuah turin a man a to deuh avangin harsatna an tawk tih an sawi. 

Mipui vantlang chuanna chi lirtheia VLTS khawl vuah lo leh tinung lo chuan motor registration a tih theih tawh dawn lo va, permit renew pawh a theih tawh dawn loh niin an sawi bawk.

Transport department thawktute chuan VLTS khawl hi lirthei khalhtu leh a chuang inkarah dah thin niin hmeichhia leh naupang harsatna tawk an awm chuan an hmet a, command & control center-ah thlenin emergency response support system-ah hriattir leh thin an ni a. ERSS duty-te hian police station hnai berah hma la turin an hriattir chhawng ve leh thin a ni.

VLTS atang hian puih dilna ‘emergency alert’ hi Mizoramah tum 1,53,726 dawn a ni tawh a; mahse, heng zingah hian han umzui ngai lian tham a la awm lo a. A tlangpuiin lo hmet palh emaw, kut hlei vanga lo hmet emaw an ni tih an sawi.

VLTS hi sawrkar laipuia Ministry of Road Transport & Highways-in October 25, 2018 a order a chhuah zulzui a hmalakna niin October, 2022 atang khan Mizoram sawrkar pawhin hma a la tan a. Command & Control Center pawh September 15, 2023-ah hawn a ni.

Passenger phur chi motor reng reng, January 1, 2019 hnua lei ho chu order chhuah atanga thla 12 chhungin VLTS an vuah tur a ni a, auto rickshaw leh 2-wheeler taxi te erawh chu hei hian a huam ve lo a ni.

Mizoramah chuan VLTS hi transport department leh National Informatics Centre tangkawp chuan an buaipui a. Project pum pui man hi Rs. vaibelchhe 10.4 niin sawrkar laipui leh Mizoram sawrkar chuan 90:10-in an intum sem a. Mizoram chu hmarchhak state zinga buaipui hmasa ber a ni. 

VLTS hi Nirbhaya case tia hriat lar, kum 2012-a Delhi-a bus chhunga pawngsualna tak thleng vanga sawrkar laipuiin lirthei a chuang, a bikin hmeichhiate himna atana hma a lakna a ni a. Ministry of Women & Child Development pawmpuina hnuaiah Nibhaya Framework vuahin project hi kalpui a ni.