Aizawl February 13, 2023: MPCC President Lalsawta chuan vawiin khan Congress Party zawm thar Edenthar-ah ah a lawm lut a, lawmluh te hmaah thusawiin Lalsawta chuan, "MNF Party-in SEDP nuai thum vuak tluk min tiam a, an pawisa hi a vuai pawh ni mai lovin, a lem a ni. A tak a awm lo a, inbumna a ni. Mizorama Party te hian kan mipuite hi bum tawh lo ang u. Dawt sawi ching tawh lo ang u," a ti. 

Lalsawta chuan, "Kum 2018 MLA General Election-a kan tlak chhan kha eng dang vak a ni lo. Kum 10 kan sawrkar tawh a, mipuiin min ning tawh a, kan tla a ni mai. Congress Party thawh that thlir lovin kan tihsual tlemte a ri ring zawk a, kan tih that tam zawk a ri zawi tlat a. Chu ni lo se sawrkarna siam leh thei kan ni reng. Mahse, Pathian remruatna in kum 2018 khan kan tla ta a ni. Congress Party chuan tlawm takin chêng nuai khat kan sem ang kan ti a, kan sem mai a. MNF Party-in SEDP nuai thum vuak tluk min tiam a, an pawisa hi a vuai pawh ni mai lovin, a lem a ni. A tak a awm lo a, inbumna a ni. Mizorama Party te hian kan mipuite hi bum tawh lo ang u. Dawt sawi ching tawh lo ang u," a ti.

Congress President chuan, "Mizoramah ram mipuite tan Congress Party kâwl a êng a. Party mipui kan phur thar a tul a. Party mipui chauh ni lovin Mizoram mipuite pawh lo phur a, min tawiawm turin ka sawm che u a ni. Sum hmanga inlei tum te hi kan hlau em? Congress Party hian kan hlau lo. Pathian râwn chungin thluaka sum lut natna hi umbo kan tum zawk a ni. Kum 2023 Krismas hi chu Pathian leh mipui zarah Congress Party sawrkarna hnuaia hman ngei kan tum a ni," a ti bawk.

Congress Party President Lalsawta hian Edenthar Veng, Aizawl-ah MNF Party Local Council Treasurer Biakmawii w/o Hrangliantawna leh member 44 Congress-ah an lawmlùt niin MPCC thuchhuah siam chuan a tarlang.