Aizawl April 5, 2023 - Rural Development Minister Lalruatkima chuan Mizoram-a Post Office (Dâkin) hmasaber awmna Tlabung-ah vawiin khan Mizorama RD Block 28-na atan Tlabung RD Block a hawng. 

Kum 1871 khan Tlangbung-ah hian Dakin sak a ni tawh a, kum 152 hnuah pawh he Dakin hi hmuh theihin a la awm. Chu Dakin awmna khuaa RD Block thar lawmna inkhawm hi Tlabung Rural Development Block Office Complex-ah buatsaih niin, RD Minister hian Tlabung RD Block Office pawh a hawng nghal a Office thar sakna tur lungphum a phum bawk a ni.

RD Minister Pu Lalruatkima chuan Mizoram history-a hmun pawimawh tak luahtu, Mizoram kawtchhuah hmasa Tlabung in RD Block an nei ta chu a lawmpui thu sawiin kum 30 chuang hnu zetah Mizoramin RD Block thar pahnih - Kawrtethawveng leh Tlabung RD Block-te kan nei leh thei chu thil chhinchhiah tlak leh hmasawnna ropui tak a ni, a ti a. Tlabung RD Block pawh a chhunga cheng mipuite tana hmasawnna thlentu leh mi harsa zawkten lei rem anlo rah ve theihna tura hnathawktu an nih ngei theihna turin duhsakna a hlan a ni.

West Tuipui bialtu MLA Pu Nihar Kanti Chakma pawhin thu sawiin vawiinah a bial chhunga RD block hawn a ni thei ta chu lawmthu a sawi a. Tlabung RD Block chu a chhunga cheng mipuite tana rahbi thar thlentu leh kawng hrang hranga hmasawnna thlentu a nih ngei a beisei thu sawiin mipuite pawh sawrkar thawhpui thiam turin a chah a ni.

March ni 25, 2022-a Council of Ministers thukhawm chuan Kawrtethawveng RD Block leh Tlabung RD Block siam tura rawtna lut chu a pawm a. Tlabung RD Block thar hi May ni 20, 2022 khan Lungsen RD Block leh Bunghmun RD Block atanga then hran niin Tlabung RD Block chhungah hian authorised village 17 leh authorised sub village 10 a awm a ni.

Block thar pahnih - Kawrtethawveng leh Tlabung RD Block te enkawl zuina turin Rs 66.42 lakhs chu Finance Department in ni 1.11.2022 khan a allocate bawk a. Tlabung BDO office thar, officer quarter leh staff quarter tur te tan ruahmanna pawh siam fel vek tawh niin a sak hna hi tan nghal thuai tur a ni.