ZALEN June 7, 2026 : Nimin khan sam tla thinte harsatna su kiang turin JL Building, Tuikual-ah LBS NewLife Clinic hawn a ni a, thiamna bik nei doctor leh nurse-ten khawl hmangin hna an thawk dawn a, hauh lawk eng emaw zat an awm nghal.

Mizoram Health Department Principal Director (Rtd) Dr Lalrinliana Sailo-in a hawng a, “Mizoramah hetiang hi a la awm ngai lo a, hair transplant clinic hmasa ber hawn a ni thei hi thil lawmawm a ni,” a ti. 

Mizo zinga orthopedics specilist hmasa ber, Dr Rinliana fanu Dr Lalnunpari Sailo chuan LBS NewLife Clinic hi a thut chilh dawn a ni.

Dr Pari hi skin specialist (MD - Dermatology, Venereology, Leprosy) niin sam phun lama thiamna bik nei a ni a, hair technician pahnihin puiin thiamna bik nei mi dangte nen an vil ang.

LBS Group hotunu T Zosangpuii chuan Mizorama hair transplant clinic awm hmasa ber an hawn theih avangin Pathian hnenah lawmthu a sawi bakah, mite tan malsawmna ni turin an hlan fel tawh tih a sawi. 

Sam phunna bakah hriselna kaihhnawih dang - physiotherapy, ultrasound, X-ray, endoscopy leh thisen lakna laboratory an bun tel nghal bawk.

NewLife Clinic hi Dr Rinliana din, NewLife Hospital chawi nun thar lehna a nih thu Dr Pari chuan a sawi a. khawl mamawh leh thil dangah a tha thei ang berin anmahni dawrtute tan hnathawh an tum thu a sawi bawk.