Aizawl : BJP Mizoram chuan vawiin November 11, 2022 (Friday) khan BJP State Office, Atal Bhawan-ah Friday Political Session an nei, State President Vanlalhmuaka chuan Mizoram-a sawrkar kan hmuh tawh party te chu corruption nena inkungkaihna thuk tak nei an nih thu leh sawrkarna an chan chuan corruption Mizoram atanga paihchhuah chu an hna pui ber anih tur thu a sawi.

Vanlalhmuaka chuan, "Kan ram hian hmangaihtu tak tak a mamawh a, Corruption lak atanga chhanchhuak tu tur kan ram hian a zawng mek a ni. Mizoram-a sawrkar tawh kan hmuh party te hi chu corruption nen inkungkaihna thuk tak nei te an nih avangin kan ram hian kan chhiat phah ta a ni. Chuvangin keini BJP te erawh chuan kan Ram thanmawh bawk, mipui te retheihna sala min hnukluttu corruption hi hnungkhirh a, Mizoram atanga paih chhuah hi kan hna pui ber tur a ni dawn a, Corruption hi kan hnungkhrih hnuah chuan Mizoram hian hmasawnna hi a takin a hmu tawh dawn a ni," a ti.

Hmuaka chuan sawi chhunzawmin, "BJP Mizoram te chu Kristian te'n kan hla sak thin pakhat angin, harsatna tawk thei kan ni a, 'Harsatna tawk lo rawngbawltu awm maw?' tih hla ang deuhin, BJP Member te chuan harsatna kan tawk ngam tur a ni a, development chanchint tha kan puanna kawngah party dang te ang lo takin kan tih theih loh tur thil kan sawi ve tur a ni lo. Lal Isua Krista hnungzui te pawhin rawngbawla an chhuah naah harsatna tam tak an tawh thin angin, keini pawh ram 'Development' chanchin tha rawngbawla kan feh chhuahnaah harsatna chitin reng kan tawk anih pawhin, chumi tur chuan kan inbuatsaih ang a, kan ram hian hmel thar a hmu thei dawn a ni," a ti bawk.