ZALEN March 24, 2026: Tourism Department Minister Lalnghinglova Hmar hovin Tourism Department officer te leh Mizoram Synod aiawhte chu vawiin khan an inkawm a, Mizoram tlawhtu tourist pung zel lo dawnsawn kawngah thawhho dan tur an sawiho. 

Tourism Minister Lalnghinglova Hmar chuan Mizoram tlawhtu pung zel chu thil lawmawm tak a nih rualin fimkhur taka lo dawnsawn a tul tih a sawi a. “Kum 2025 chhungin tourist nuai 8 chuang an awm a, kuminah a aia tam an awm kan ring. Tourist te hi lo kal belh zel se kan duh a, chutih rualin mi chi hrang hrang lo lut hian thil tha lo ken tel a nei thei a, chung laka lo inven leh dawnsawn kawngah nasa taka zirtirna kalpui a ngai.” a ti a. “Mizoram pawn atanga lo kalte hi a tam ber chu ring lo mi an nih angin, biakin chhung leh a chhehvela awm dan mawi te pawh inzirtir a ngai,” a ti a, kohhran hotute tan pawh ring lote hnena rawngbawlna hun tha a inhawn theih thu a sawi. 

Mizoram Synod aiawhte pawhin thu sawiin, tourism-a hmalakna langsar tak awm mek chu lawmawm an tih thu an sawi a. Hnamdang min tlawhtute’n nuam ti tak si, kan chenhona leh khawtlang nun zah tak sia hun an hman theihna’n sawrkarin ruahmanna mumal tak neih pawimawh an tih thu an tarlang. Kan ram mawina leh khawtlang nuam tak kan neih – hmeichhiate tan a him, traffic dan zawm tha etc. – te chu Kristianna vanga kan neih a ni tih tarlan pawimawh an tih thu an sawi bawk a ni.  

Vawiina inkawmhonaah hian thlasik boruak nuam leh Krismas bawr, tourist tam zual lai chu a hlimhlawp lam bakah Chanchin Tha hrilhna remchanga hman theih tha tih a ni a. Mizoram sawrkarin CAN (Culture, Adventure leh Nature) lam hawiin tourism a kalpui mek thu leh, a bik takin ‘Cultural tourism’ ah, Mizo culture leh Kristianna langsar zawka tarlan kawnga thawhho theih dante uluk taka sawiho a ni.

Tourist te’n awlsam taka an chhiar theih turin Mizoram an cham chhunga hriat tur pawimawh hrang hrangte ziak a thehdarh tha tih a ni bawk. 

Mizoram tourism in hma a sawn theihna’n kohhran a inhawng a, an tangkai theihna leh sawrkarin a mamawhna zawnah chuan thawhho an duh tih Mizoram Synod aiawhte chuan an sawi a. Sawrkarin kohhran hmalakna tura a beisei hrang hrangte chu inthlahrung hauh lova hrilh thin turin Tourism department hotute an sawm a ni. 

Tourism Minister ho hian Council of Churches in Mizoram leh Tourism Department aiawhte chu kumin January 20 khan Mizoram tourism chungchang thlirhoin an lo inkawm tawh a. Kohhran dangte leh NGO dangte nen pawh inrawnkhawmna hi neih zel tum a ni.

Vawiina inkawmhonaah hian Tourism Department atangin Commissioner & Secretary Vanlaldina Fanai, Additional Secretary Irene Zohlimpuii Chongthu, Director R. Lalrodingi, Director leh officer dangte an tel a. Mizoram Synod atangin Rev. Dr. K. Lallawmzuala, Executive Secretary bakah Synod Social Front atangin Rev. Lalrinmawia, Lalchhungliana leh Upa Lallianmawia te an tel a ni.