Aizawl; Midang ten mitvar an neih theihnan mi 3781 in an mit midangte hman atan an pe (pledge) tawh a, heng zinga mi 265 te mit naute (cornea) lak a ni tawhin mi 165 hnenah vuah a ni tawh bawk. Zirtawpni kaltaa 29th Eye Donation Fortnight hmanna ah he thu hi Dr. KL Remsanga chuan a sawi a, midangte tana mit pek chu a hlauhawmlo tih sawiin, "mi zawng zawngin mit an pe thei a, mahse mit lak zawng zawng midangte mit a vuah atan a hmantlak vek lo a, mahse research tih nan a tangkai avangin a thlawn a awm thei lo a ni," a ti. Dr. Remsanga chuan mit an lak (transplant) te chu 'Eye Bank' ah darkar 72 chhung bak a kawl theihloh avangin Mizoram chhunga hmanna tur a awmloh chuan Kolkata leh Guwahati ah te an thawn thin niin a sawi bawk. He Fortnight hmanna a khuallian Health Minister Lal Thanzara chuan India ramah mit mamawh an tam ang hu in midangte tana mit pe an tlem tih sawiin tanlak ngai a tih thu a sawi a. "Khawvel mawina leh ropuina hmu ve thei tura midangte tana mit kan pek hi ringtu kan nih anga kan tih ve ngei tur a ni a. Mitdelte hian Jerusalem tharah kherlo pawh he leiah ngei hian mitvar an ni thei a ni," a ti bawk. Health Minister hian midangten khua an hmuh ve theihnan an nupa a mit an pek dawn thu a sawi bawk. Health Minister chuan Mizoram sawrkarin sum leh pai ah harsatna a tawk mek tih sawiin sawrkar laipui atanga sum lokal te pawh Finance department in a pechhuak zung zung theilo niin a sawi a. Sum harsatna chu hriatthiam tlan a pawimawh tih sawiin programme kalpui hleihtheihloh a awm anih pawhin news lama tlangaupui lo turin Health department thawktute chu a ngen bawk. MIZO & MIT Civil Hospital, Aizawl a Eye Bank hi July 31, 2008 khan khatih laia Healh Minister R.Tlanghmingthanga chuan a hawng. September 24, 2008 ah midangte tana mit pek (eye donate) tan a ni. September 2009 atanga mit laksak tawh zat chu 265 a ni a, hemi hun chhung vek hian mi 165 te hnenah mit vuah sak an ni tawh , heng zinga 61 hi Civil Hospital, Aizawl a vuah an ni. Mizo zinga mit pe hmasa ber chu Hmingthankima, Samtlang khua a ni. Mit pe zinga naupang ber chu C.Remlalnghaka (kum 4) Phunchawng a ni a, a upa ber chu Sapsiami (kum 91) Zarkawt veng a ni. Mit hi pek man a awm lo a, Eye Bank thawktu ten mit pe phaltu a boral atanga darkar 4-6 chhungin lak tur a ni a, hemi hnu hi chuan mit kha a hmantlak tawh lo. Mit pe duh tan Civil Hospital, Aizawl a Eye Bank ah mahni kal emaw Ph. No. 9436354701/ 2322318/102 ah te zawhfiah theih a ni.