India-in basketball hruaitu thar a nei a, an zingah Mizo pa pawh a tel. Hruaitu tharte hian hmachhawp lian tak tak an neih zingah Mizoram a langsar a, inkhelh zirna hmun tur (academy) pawh Mizorama din an tum a, basketball-ah Mizote tan kawl a êng mek.

Basketball Federation of India (BFI) hruaitu thar hi Nilaini khan New Delhi-a Jawaharlal Nehru Stadium-ah thlan niin hetah hian Dr. Lalrinawma Hnamte pawh vice president atan thlan a ni a, Mizoram basketball chanchina India ram pum pawla hruaitu nihna chelh hmasa ber a ni dawn.

Thiamna lama doctor, Aizawl Hospital neitute zinga mi, Dr. Rinawma chuan hruaitu tharte hian hmachhawp lian tak tak an nei tih a sawi a, heng zingah hian Mizoram pawh a langsar zingah a tel tih ZALEN-in a biaknaah a sawi.

“President thar (Aadhav Arjuna) ho hian kan phur a, inthlan hma atangin tih tura hmachhawp leh inzawrhna (manifesto) pawh kan nei a, chu chu ‘New India’ tia vuahin basketball-ah India hi bung thar kaipui ngei kan tum a ni,” a ti.

Heng an hmachhawp lian tak tak zingah hian India ram hmun hrang hrang pangaa academy din pawh a tel a, “Heng zinga pakhat hi Mizorama din tura tih a ni,” tiin Mizo pa hian Mizo thalaite tan a hlawhtlinpui ngei a beiseiawm hle.

Dr. Rinawma hi Mizoram basketball hmangaihtu a ni a, kum 2011 atang tawh khan Mizoram Basketball Association (MBBA)-ah office bearer post hrang hrang a lo chelh tawh a, tunah senior vice president ni lai a ni a, a hma chiah khan term hnih a zawnin president nihna a lo chelh tawh a. Hei bakah hian Mizoram Olympic Association-ah kum riat zet sum vawngtu a lo ni tawh bawk.

BFI vice president atana mi pasrih thlan chhuah zinga a tel chungchangah hian Dr. Rinawma chuan a mi mal theihna a ni lo tih a sawi a, “Mi mal a ni lo va, pawl (MBBA) hlawhtlinna a ni a. He dinhmun ka thlen theih chhan hi Mizorama basketball a than vang a ni a, chumi tur chuan ka lo thawhpui tawh leh tuna thawhpui mek zawng zawngte an pawimawh a, kei hian tunah a par ka chhuang mai chauh a ni,” a ti.

MBBA pawhin an senior vice president, Dr. Rinawma’n India ram pum hruaitu nihna a chelh tur hi an lawmpui tak zet tih sawiin a kal zelna turah duhsakna an hlan bawk.

Inthlana Mizoram aiawha tel ve dang, MBBA President R.Lalnunpuia pawhin Mizoramin a la tawn ngai loh, BFI-a vice president hial an nei thei ta chuan Mizoram leh India hmarchhakah hmasawnna tam tak a thlen a beisei thu leh Dr. Rinawma a lawmpui thu a sawi bawk.

BFI hi kum 1950-a din kha niin hruaitu atan hian president pakhat; vice president pasarih; secretary general leh treasurer pakhat ve ve, joint secretary panga bakah executive committee member tur mi pali an thlang a ni.