Aizawl February 22, 2023: Sawrkar laipuia Rubber Board Executive Director Dr. KN Raghavan chuan vawiin khan Aizawl Press Club-ah chanchinbumite a kawm a, Mizoramin hlawk zawka rubber a chin theih nan kawng hrang hrangin hma an lak thu a sawi.

Dr. KN Raghavan chuan Mizoram-ah kum 2020 March thla, Covid 19 avanga lockdown puan hma chiah khan a lo kal tawh thu a sawi a. Hemi tum hian development office an hawn thu leh tunah hian Mamnimalayar Deport an hawn thu a sawi a. Northeast-ah ram hectare nuai 2 a zauah rubber chin a nih theih nan Rubber Board in programme hrang hrang hmangin hma an lak mek thu a sawi a. Hetah hian sawrkar laipuia Commerce & Industry Minister kaihruainain vil reng a nih thu a sawi a ni. Kum hnih kalta chhung khan hmarchhakah hectare sing 2 sang 7 a zaua rubber chin hman a nih thu a sawi a. Mizoramah chuan kuminah Hectare 1600-a zau ram chu hmalak lehna tura enfiah mek a, ram hectare 6000 atanga 10,000 an la tuamchhuah theih an beisei thu a sawi a. Tunah hian rubber board chhinchhiah danin Mizoramah ram hectare 4,520 a zauah rubber chin mek a ni a, rubber chingtu hi mi 450 an ni mek a ni. 

Rubber Board Executive Director chuan tuna rubber chingtu awm mek te bakah ching thar tur te tha taka puih an tum thu a sawi a. Tun tum a rawn zina a hawn tak Manimalayar depot-ah loneituten an rubber chinna bungrua Silchar-a an lam thin chu tualchhungah an lam zung zung theih dawn thu leh a man pawh a tlawm zawk dawn thu a sawi a. Rubber pawh rate pangngaiin tualchhunga Manimalayar depot hawn takah hian awlsam takin an hralh thei dawn tih a sawi bawk a. Hei hian rubber chingtute tan hlawkna tha tak a thlen a beisei thu a sawi a ni. A hma chuan hmarchhak bikah Tripura-ah hma an lak nasat zual bik thu Dr. KN Raghavan chuan a sawi a, tunah chuan hmarchhaka state dangah te pawh hma an la chho dawn tih a sawi. India ramin ton nuai 13 rubber a mamawh thu leh tunah hian ton nuai 8 bawr vel India-in a thar chhuah thu a a sawi a. Hei vang hian India-in a rubber mamawh hi ramchhunga a thar vek theih nan hma lak a ni a ti a. 

Mizoram sawrkarin Rubber Board te tha taka an thawhpui avangin Dr. KN Raghavan chuan lawmthu a sawi a. Rubber chingtute pawhin tha taka an lo thawhpui thu sawiin an mamawhna hrang hrangah an puih dawn thu a sawi a, chanchinbumite puihna pawh an mamawh thu a sawi bawk a ni. 

Vawiin chawhnu khan Chanmari YMA Hall-ah rubber chingtute kawmna hun a hmang nghal bawk a. He hunah hian Rubber Board hnathawh hrang hrang sawifiahna hun hman a nih bakah rubber chingtute hamthatna te hrilhfiah an ni a. Tha zawka rubber an chin theih dan tur sawipui an nih bakah rubber chingtute harsatna te Rubber Board hotute hian an ngaihthlaksak a ni.