Aizawl; Nausen kum khat hnualam thihna Infant Mortality Rate (IMR) a Mizoram dinhmun chu 2013-2014 ah 35 a ni a, hei hi kum hmasa 2011-2012 a 29 leh 2012-2013 a 28 aiin a sang zawk a ni. ZALEN palaiin a kawm naah State Programme Officer, (RCH) Dr.Lalthanga chuan 2013-2014 a Mizoram IMR 35 chu a tak takah chuan 30 vel anih a rin thu a sawi a. State thenkhat chuan report dik tawk chiahlo te pawh an pe nia sawiin Mizoram chuan report an hmuh ang ang central lamah an thawn mai thin a ni a ti a. IMR san chhan chu nausen thi report a tha a, hetih lai hian naupiang lam report a tha tawklo a, hemite pahnih hi buk kawp a ngaih bawk avangin Mizoram chu IMR ah a sang ta mai niin a sawi. Dr. Lalthanga chuan Saiha, Lawngtlai, Mamit leh Lunglei district ah te IMR a sang tih sawiin a bik takin Tuikuk leh Chakma zingah a sang zual niin a sawi a, heng area ah te hian nasa lehzuala tan lak an tum niin a sawi bawk. Dr.Lalthanga chuan RCH hmalakna chuan rah tha a chhuah thuai a beiseiawm tih a sawi bawk a. Health department thawktu ten theihtawp chhuah mahse mipuiin an tawiawm thatloh chuan awmzia a nei tlem tih a sawi a. "Nau nei tur reng rengin damdawiin ah nau nei ngei se kan duh a, tun hmaa nau nei tur 40% vel in lama nau nei thin kha tunah chuan 20% ah a tlahniam tawh a, hma kan sawn hret hret zel a, kan hlawhtlinna hi thawklehkhata lang nghal thut chi a ni lo a, tun atanga reilote ah chuan kan ziaawm kan beisei a ni," a ti.