Aizawl October 6, 2024 : Mizoramah kumin September thleng khan lirthei 3,18,191 a awm a, 2,21,851 (69.72%) chu Aizawl district-a awm a ni a. Lirthei zingah two wheeler tam berin, 68.56% a tling phak.

Transport department chhinchhiah danin Mizorama lirthei awm zawng zawngah two wheeler tam berin, kumin September thleng khan 2,18,167 a awm a, car 52,940 awm bawkin, goods carrier 22,849 a awm a, chungte chu Mizoram a lirthei tam zualte an ni.

Aizawl bakah Mizoram hmun dangah motor cycle/scooter-used for hire (2wheeler taxi) 4,126 a awm tawh bawk.

Transport dept. tar lan danin DTO Aizawl (MZ-01) hnuaiah lirthei 2,21,851 a awm a, DTO Lunglei (MZ-02)-ah 26,759, DTO Siaha (MZ-03)-ah 8,266, DTO Champhai (MZ-04)-ah 16,772, DTO Kolasib (MZ-05)-ah 17,341, DTO Serchhip (MZ-06)-ah 11,135, DTO Lawngtlai (MZ-07)-ah 9,601 leh DTO Mamit (MZ-08)-ah 6,467 a awm a, nimin (30.9.2024) thlenga Mizorama lirthei awm zawng zawng hi 3,18,191 a tling.

DTO Aizawl-ah lirthei 2,21,851 a awm tawh lai hian Aizawl khawpui chhungah lirthei intlanchhawk kalpui chhunzawm zel a la ni dawn a, hriattirna pawh hi September 29, 2024 khan chhuah a ni.

Hetihlai hian lirthei intlanchhawk avangin lirthei a pun chak phah leh phah loh zirchianna neih a la ni ngai lo.

Tun hnaia neih Mizoram Legislative Assembly Budget Session a zawhna leh chhanna hunah zawhna chhangin transport minister chuan Aizawla motor intlanchhawkin kan ram economy-ah a tha lo zawnga nghawng a neih dan chu transport department atang zir chianna a la awm lo a, zir chiangtu tur pawh ruat a la ni lo.

Transport minister tar lan danin lirthei intlanchhawk hman a nih hma kum ruk (2011-2012 atanga 2016-17) chhung a lirthei registered zat 60,416 a nih laiin intlanchhawk hman a nih hnu kum ruk (2017-18 atanga 2022-23) chhung a lirthei registered thar zat chu 1,26,697 a tling.