Aizawl: Mizoram sawrkar chuan naktuk Thawhtanni atang hian Maggi zawrh leh lakluh a khap dawn tih Health Deptt. thawktuten an sawi. Food and Drugs Administration hotute sawi danin Maggi khapna hi Commissioner of Food Safety Dr. K.Ropari chuan a tichhuak dawn. Maggi khap anih hma hian hian Energy drink chi 4, Monster, T Zinga, Cloud 9 Pomegranate, Grape Energy Drink tia sawi bawk leh Akoaroma Drink te chu Mizorama zawrh leh hralh khap a lo ni tawh bawk. Maggi ah hian mihring hriselna atana thalo thil chi hnih Hmehhan leh Lead a tel niin state thenkhat chuan an test-naah an hmu a. Lead hi cancer thlen theitu ani a, hmehhan (monosodium glutamate - msg) pawh dan phal bak an telh a, hei hian hriatna thazam a tichhe thei nia sawi a ni. Wai Wai, Rum Pum leh khawchhak lam atanga eichawp lakluh te chu a rang lama endik an tum tih Health Deptt. thawktute chuan an sawi. Thudawn danin Wai Wai ei avanga pumna leh luak an tam hle a, dawrkai thenkhat chuan Wai Wai an zawrh mek chu mihring hriselna atan a that leh that loh endik sak ni thei se an duh thu an sawi. Energy Drink zawrh khap zinga mi Tzinga Super Distributor SLT Liana & Sons te chuan an hnena lei chhawng dawrkai te chu an hnenah kir tura an hrilh darh thu an sawi a, Mizoram sawrkar atanga hriattirna an dawn hma in Company lamin zuar chhuak lo tura an lo tih tawh avangin thla khat vel kalta atang khan an dawr atangin an zuar chhuak tawhlo niin an sawi bawk.