Aizawl: India ram pum huap Tuberculosis (TB) zirchianna, ‘TB India Report 2018,’ thla hmasaa tihchhuahah Mizoram bika TB an hmuh chhuah zingah 100 zela 7 (7%) te chu HIV positive an ni a. India ram pum angin TB vei HIV +ve hmuhchhuah tam lamah 4-na a ni. TB India Report 2018-in a tarlan danin Nagaland chu 1-na an ni a, an state chhunga TB vei za zela 14 (14%) te chu HIV positive an ni a, 2-na Andhra Pradesh (10%), 3-na Karnataka (8%), 4-na Mizoram (7%) leh 5-na Telangana 6% te a ni. Dr. Lalchhanhima Ralte, Synod Hospital chuan Mizo TB vei zinga HIV an nih leh nih loh in-test-te hian an dinhmun an inhria tih sawiin hei hi TB leh ART centre thawhhona that bakah damlo zingah awareness a san vang pawh a ni theih thu a sawi bawk. Manipur/Nagaland/Meghalaya-ah ve thung chuan an TB damlo zaa 40–55 chauhin HIV an vei tih an inhria a, hei hi TB damloin HIV test pawimawhna an hriat loh avang leh linkage a that loh vang a nih a rinawm niin Dr. Chhanhima chuan a sawi bawk. India ram state dang TB damlote zingah chuan zaa 80 – 90 dawnin an HIV status an hre thung a. Northeast state zingah chuan HIV an vei a ni tih hriat tul tihna lamah kan sang fal nalh tih sawiin hetih rual hian India ram nawlpui anga chhut chuan tan lakna tur a la tam hle niin Dr. Chhanhima chuan a sawi a. Zirchiannaah hian TB zingah Chuap TB an tam ber a, a vei zawng zawng atanga chhutin 82% an tling tih sawiin, “Khawsik, rihna tlahniam, zana thlan tla emaw khuh an nei fo a, HIV positive bawk si chuan TB in-test nachang i hre thar leh ang u,” tiin Dr. Chhanhima chuan mipuite a chah bawk.