Aizawl: Nimin khan Aijal Club-ah National Peoples Party chu Mizoram ah din (launch) a ni a, NPP din a nih thu puangtu NPP President leh Meghalaya Chief Minister ni mek, Conrad Sangma chuan Mizoram inthlanpuiah a tam thei ang ber candidate siam an tum thu leh sawrkarah tel ve ngei an tum thu a sawi. Conrad Sangma chuan NPP chu hmarchhak tribal leh kristian ten tangruala aw lian zawk an neih theihna atana din a ni tih a sawi a. “NPP hi thalaite tana ding a ni a, thalaite hi reservation piah lam thlenga dinhmun tha an chan theih nan kan bei zel dawn a ni,” a ti. NPP President chuan mi thenkhat in BJP leh NPP chu inang nia an sawi thin chu a dik lo tih sawiin, “BJP nen hian kan inang lova, party hrang daih kan nih mai bakah kan ngaihdan pawh a dang daih a ni,” a ti. Press mite zawhna chhangin NPP President chuan an party chuan Manipur, Nagaland leh Arunachal Pradesh-ah te sawrkar siamtu zinga a tel angin Mizoram inthlanpui loawm turah pawh candidate a tam thei ang ber siamin sawrkarah tel ve an tum dawn tih sawiin, “Dinhmun pawimawh tak luah kan tum a ni,” a ti a. MLA R.Lalzirliana leh Lalrinliana Sailo te nen an inbia em tih zawhna chu an inbiak ngei thu sawiin thil awm dan an ngaihchan mek thu a sawi a. Aizawlah office hmun tur an ngaihtuah mek tih a sawi bawk. Mizorama NPP dinna huna thu sawitu dang NPP Vice President Phunzathang Tonsing chuan NPP chu hmarchhak bialte tan party tha a ni a ti a. Mizoram Chief Minister Lal Thanhawla chungchang sawiin, “A tih tur a ti zo tawh a, tunah chuan old testament a ni,” a ti a. BJP leh NPP chu thian tha mai an nih thu a sawi.   Meghalaya Home Minister leh NPP thupuangtu ni bawk, James Sangma chuan Mizoramah NPP din a ni ta chu lawmawm a tih thu a sawi a, “Hmarchhak mite hi kan tanrual phawt chuan kan chanvo hi tam lehzual kan hmu thei dawn a ni," a ti bawk. &&&&&