ZALEN August 30, 2024 : Mizoramah mi thiamten hmun danga an la hmuh loh nungcha (species) thar hmuhchhuah 20 leh Mizoram pawn, India hmarchhak, Myanmar leh Asia ram atangin chi hrang hrang an nei tawh a. Mizoten rul hlauhawm taka an ngaih, rulngan chuk vangin mi pahnih an thi tawh bawk.

ZALEN zawhna chhangin Mizoram University-a Zoologist department hotu, Prof. HT Lalremsanga chuan nungchate hi che sawn ve reng an nih avangin Mizoramah ram danga awm ve lo nungcha engzat nge hmuhchhuah tawh tih sawi a har hle tih a sawi a. “Keimah mai ni lo, kan dept. bik atanga researcher dangte nena nungcha species thar Mizoram chhung atanga kan hmuhchhuah chu 20 an ni tawh a. Mizoram pawn lam, India hmarchhak, Myanmar leh Asia ram atangin chi hrang hrang an awm nual bawk a. Researcher-ten an la record ve loh vang a awm ve lo ang a ngaih an ni chauh a. Chuvang chuan ram dang atanga la hmuh ngai loh Mizoram atanga hmuhchhuah hmasak ber tih hian a dik zawk a. Kum 2019-a Mizoram atanga rul species thar kan hmuhchhuah, Smithophis atemporalis (Ruahlawm rul) pawh kha nikum (2023) khan Bangladesh atangin record a ni ve leh a ni,” a ti.

Rulngan chuk chungchanga ZALEN zawhna chhangin Prof. HT Lalremsanga chuan, "Ka hriat theih chinah Mizoram chhungah chuan rulngan hian kum 2009 khan mi 2, Champhai Zotlang leh Sihfa ami rulchuk haw lo anga inngai tlat a chuk hlum bak chuk hrim hrim hriat belh ka la nei lo a. Rulngan te hi a tlangpuiin rul dang tam takte aiin an zaidamin mihring min hmuh chuan insaseng zel an tum thin a. Rulngan tûr hi neurotoxin (hriatna thazam tibuai thei) a ni a, a tûr hi thihpui theih a ni," a ti.