Aizawl: Myanmar sipai leh Arakan Army te inbeihna vanga Mizoram chhung, Lawngtlai district khawthlanga raltlan chu mi 1240 an tling tawh a, raltlan zat hi a la pun zel rin a ni. Myanmar Army leh Arakan Army te hi tunlai hian Myanmar ram chhungah an inkap deuh reng niin Lawngtlai Police te chuan an sawi a, Zirtawpni khan Lawngtlai Police te chuan raltlante dinhmun enfiahin, an kal lai hian Zochachhuahah raltlan 420, Laitlangah 500, Dumzautlangah 120 leh Hmawngchhuahah 200 an awm niin an sawi. Raltlante hi Mizoram sawrkar chuan eitur a pek bakah an hriselna endik turin ruahmanna a siam mek nia thudawn a ni. Lawngtlai atanga thu dawn danin Multi Modal kawngpui in Myanmar ram a pawhna tur bul Zochachhuah thlang lawk, Myanmar ram chhung, Varang leh a chhehvelah te Zirtawp zan an inkap leh niin an sawi a. Mizoram chhung, Laitlang khuaah pawh Arakan Army te an inkhuar niin an sawi bawk. Arakan Army hi Rakhine hel pawl niin April 10, 2009 khan din a ni a. United League of Arakan (ULA) wing pakhat a ni a, tunah hian an commander in chief Twan Mrat Naing-a kaihhruaina hnuaiah an awm mek a ni a, Arakan mite humhimtu niin an inchhal a ni.