Mizoram Weightlifting Association (MWA) chuan National Weightlifting Championship thlen a tum a, hemi tur hian hmabak tam tak a la neih avangin an hruaituten theihtawp an chhuah mek.

Kumin national championship - senior, junior leh youth te hi Kerala-a thlen tura tihfel vek tawh a ni a; mahse, an inhnuhdawh thut avangin Indian Weightlifting Federation (IWF) chuan Mizoram an dawr a, MWA hruaitute pawhin thlen theih ngei tumin hma an la mek.

India ram pum huap inelna thlen an tum chungchangah hian Nilaini khan MWA hruaitute hian Chief Minister Zoramthanga pawh a pisaah an hmu a, an hmachhawp lian tak tihhlawhtlin a nih theih dan turte an sawipui.

MWA General Secretary Malsawma Khiangte chuan national championship thleng tur hian sum, hmanrua leh hmunhma (infrastucture) tam tak mamawh a ni tih a sawi a. IWF atang hian tih dan thinah thlengtu puihna Rs. nuai 20-25 vel an dawng thin a, an association tan ram pum huap inelna thleng turin sum leh hmanrua an neihin a tlin loh avangin state sorkar hi an pur tih ZALEN a hrilh.

National championship thleng tur hian Rs. nuai 100 vel tal an mamawh tih a sawi a, chief minister an sawipui pawh hian a phurpuiin a tihhlawhtlinsak theih tur thu tiam thei nghal lo mah se sorkar hotute nen ena sawiho a lo tiam tih Malsawma chuan a sawi.

Chief minister pawh hian social media-ah MWA hruaituten an inkawm thu hi a tar lang a, “Mizoram leh India ram tihmingthatu, Jeremy Lalrinnunga kan nei a; chuvangin, Mizoramah pawh National Senior Weightlifting Championship thlen ve ngei an duh thu leh chumi atana mamawh awmte an rawn thlen a ni. An thil rawn thlente a hlawhtlin ngei theih nan thuneitute nen pawh la sawi hova hma lakpui ka tum thu ka lo hrilh,” tiin a tar lang.

MWA general secretary chuan sorkar hian an mamawh zat ang a tumsak thei lo a nih pawhin kawng dang dapa inelna thlen dan dap an tum thu a sawi bawk.

Malsawma chuan intihsiakna thlen hi Mizoram tan pawh hmasawnna tur a ni tih thu a sawi a, “Hmanrua ringawt pawh neih belh ngai a tam dawn a, chungte chu kan tan hmasawnna zel tur a ni,” a ti.

Inelna hi an thleng thei dawn a nih chuan December chawlhkar hnihna vel an tinzawn tih a sawi a, a hmun atan pawh R.Dengthuama Hall kawt zawlah hmunhma siam rema an rilruk tih a sawi bawk.

MWA chuan ram pum huap inelna thlen an châk chhan pakhat chu Mizoten ram pum huap bakah khawvel huap pawha chhuanawm tak tak rit chawi mi a neih lai a ni a, heng mite hi an hnampuite hmuh lai ngeia rit an chawi lai hmuhtir an châk tih a sawi.

“Mizoten ritchawi chak tak tak kan nei tawh a. Jeremy-a, Lalchhanhimi leh Lalruatfela bakah mi dang pawh an awm nual a, heng mite hi Mizote hmai hmaah ngei an che vel lantir se tih kan duh a ni,” a ti.