ZALEN March 1, 2026: Kum 19 kalta 2006-2007 atanga 2024-2025 inkar chhung khan Mizoramah RTI hmanga hriat duh dilna lut 40,250 a awm tawh.

Mizoram Information Commission-in 19th annual report 2024-2025 an tihchhuah atanga a lan danin Mizorama RTI hman tan, kum 2006 atanga March 31, 2025 inkar chhung khan RTI hmanga information dilna hi 40,250 a lut tawh a. Hei bakah 1st appeal dilna 730, 2nd appeal 197 leh complaint 160 a lut tawh bawk.

Report atanga a lan danin kum 2008-2009 kha RTI hmanga thil hriat duh zawhna lut tlem ber kum niin 177 a lut a, kum 2024-2025 kha a tam ber kum niin 7,394 a lut.

Kum 2024-2025 bikah hian ziaka RTI hmanga information dilna 2,700 a lut a, heng zinga 2,541 chu Mizoram chhunga mi niin 159 chu state pawn atanga lut a ni a. RTI online hmangin dilna 4,694 lut a awm bawk a, heng zinga 4,615 hi Mizoram chhung atanga dilna niin 79 chu state pawn atanga dilna a ni thung.

RTI hmangtuten an thil dil zingah hian directorate-a dilna tam berin 3,005 a tling a, secretariat atanga information dilna 2,682, district thuneitute hnena dilna 1,381 leh a dang 326 a awm bawk a ni.

Kum 2024-2025 chhunga RTI dilna lut 7,394 atang hian chhanna 7,205 pek a ni a. Hengte hi directorate-a lut 3,005 atangin 2,896, secretariat atanga information dilna 2,682 atangin 2,630, district-a dilna 1,381 atangin 1,369 leh hmun danga lut 326 atangin 310 te an ni.

Zawhna lut atanga chhanna pek zat hi a pum puiah 97.44% a tling a. RTI zawhna dawng zingah hian district level-a lutten chhang tha berin an chhanna rate hi 99.13% a ni a, secretariat level-in dawtin 98.06% a ni a, directorate level chu pathumna niin 96.37% leh a dang (commission, board etc) ten an chhan zat chu 95.09% a ni.

Report atanga a lan danah Mizoram chhunga directorate, secretariat, board, block etc. office 258-ah RTI hmangin information dil theih a ni a. Tun dinhmunah SAPIO 403, SPIO 432 leh DAA 226 an awm.