Aizawl: Mizoramah kum 16 chhungin TB vei rinhlelh mi 26873 endik-ah TB vei 17508 hmuh chhuah niin, mi 645 in nunna an chan. Health department-a thawktute hnen atanga Zalen palai thudawn danin Mizoram-ah TB vei an pung tual tual emaw tih tur a ni a, chhinchhiah theih chinah Aizawl District-ah kum tin TB vei hmuh chhuah leh nunna chan an tam ber ziah thin a ni. Kum 2015 chhung khan Aizawl District ah TB vangin mi 22 in nunna an chan laiin Saihain dawtin mi 5 an thi a, Lawngtlai-ah 4 thiin Lungleiah 3 an thi thung a, Champhai chu a tlem ber dawttu niin 2 an thih laiin Kolasib leh Serchhipah erawh mi 1 ve ve an thi thung a. Mamit district-ah erawh kum liam ta chhung khan TB vangin nunna chan an awm lo thung a ni. Health department-a TB lam khawihtute chuan TB natna hrik pai nih zahpui an awm thin thu Zalen palai hrilhin mi khawsa thei zinga TB vei awm te chuan mi hriat an hlauh avangin Private hospital-ah a rukin an inenkawl thin thu an sawi a.Tun hma ang tho in hmun thenkhat-ah chuan thinhrik an la hlawh zel thu Zalen palai hnenah sawiin TB vei tam ber te chu kum 15-50 inkar an nih thu an sawi bawk. TB natna chu khuh atanga inkaichhawn awl tak a nih avangin khawpui chhung mipui tamna hmunah vei an tam thin thu Health depatment-a thawktute chuan Zalen palai an hrilh a, TB vei te pawh an khuh dawna an ka hupna chang hre thin tura an chah thin thu an sawi a. Zawhna chhangin chawhrualin nitin TB vei thar 6-7 zel hmuh chhuah ang a nih thu an sawi. TB vei te chu enkawlna damdawi a thlawn a pek vek an nih thu Health department-a thawktute chuan Zalen an hrilh a, TB vei damdawi regular taka ei zo te leh damdawi petu te chu lawmman pek thin an nih thu an sawi a. TB damdawi chu thla 6-8 chhung te ei tur a ni a, ei that tawk loh vang leh ei hun chhung tur ang ei loh vangin TB tihdam harsa bik Multi Drug Resistantttuberculosis (MDR-TB) a vei theih thu mipui ten hria se an duh thu an sawi. Healtha deparment hotute hnen atanga thudawn danin India rama TB vei ten enkawlna tluantling leh tha zawk an dawn theih nan TB vei awmzat te chiang zawka hriat a nih theih Sorkar laipui chuan TB chu ‘Notifiable Disease’-ah kum 2012 May khan a puang a. Private damdawiin a TB damlo enkawl zawng zawng te pawh sorkar ah an in hriattir zel tur a ni a, chutiang tilo te chu dan anga hrem theih a ni.