Aizawl; Global Adult Tobacco Survey (GATS) zirchiannain a tarlan dan chuan, Mizoramah zuk leh hmuam ti thin za zela 7 atanga 9 chauhin an bansan a. Thla khat chhungin Mizoramin zuk leh hmuam lei nan cheng nuai 2800 vel a sengral ziah a, hei hi mihring awm zawng zawng, nausen tiamin thla khatah Rs.254/- hmang ral ziah anga chhut a ni. Kumin kumtawp lam khian Mizoramah zuk leh hmuam ti thinte zirchianna 'Global Adult Tobacco Survey' neih leh tum a ni a, hemi chungchang hi May ni 9, 2014 khan I&PR Conference Hall-ah Mizoram State Tobacco Control Society leh Indian Society on Tobacco & Health (Mizoram Chapter) huaihawtin sawiho a ni. Sawihona hi Dr. Jane R.Ralte, State Nodal Officer, MSTCS chuan kaihruaiin Mizorama zuk leh hmuam ti thin ten an lo sim theihna atana thil tul leh pawimawh nia an hriatte an sawiho a ni a. Group hrang hranga sawiho niin, zuk leh hmuam chu khawpui aiin thingtlang lamah a hluar zawk nia an hriat thu te, uar lehzuala zuk leh hmuam thatlohzia inzirtirna 'media' lamah puanzar a tul thu te, vaihlo ching leh zuar ten an sim theih nan eizawnna kawng dang ngaihtuah sak a pawimawh thu te, kohhran leh ram hruaitu (public leader) ten zuk leh hmuam an nghei theih nan uar zawka hmalak ni se tihte leh vaihlo dona kawngah milarte hman tangkai lehzual nise tihte an rawt a ni. Sawihona hmanpuitu, Heatlh & Family Welfare enkawltu, Principal Secretary RL Rinawma chuan, Mizote chu intihhmuh ching kan nih avang leh kan inchiahpiah lutuk avangin zuk leh hmuam kan ti mai thin nia a hriat thu a sawi a. Chhungkua-ah theuh zuk leh hmuam thatlohzia inzirtirna kawngah tan lak tul a tih thu sawiin, a bik takin kohhranah tanlak a ngai hle a ni, a ti. Zau zawka zirtirna neih a nih theih nan print leh electronic media lamah leh vengchhung chanchinbu thleng pawhin hmalakna chhunzawm zel a pawimawh a ni, a ti. Principal Secretary chuan, Doctor te chu an damlote hnenah vaihlo thatlohzia uar zawka zirtir turin an ngen tih sawiin, zuk leh hmuam sim te in report-na tur siam nise a that a rin thu a sawi bawk. Kum 2009-2010 khan India ram pumah GATS survey hi neih a ni a, state 29 leh UT 2 a mi 70,000 vel interview an ni. Survey atanga a lan danin India mipui 34% in zuk leh hmuam an tih laiin Mizoramah chuan 67.2% in an ti thung. Mizo mipa 73% in vaihhlo leh a kaihhnawih an tih laiin hmeichhia 62% in an ti bawk a, zuk leh hmuam ching thar zingah mipa aiin hmeichhia an tam zawk. Thla khat chhungin Mizoram in zuk leh hmuam leinan Rs. nuai 2800 vel a sengral ziah a, hei hi mihring awm zawng zawng, nausen tiamin thla khatah Rs. 254 hmang ral ziah anga chhut a ni. Mizoramah vantlang hmuna meizu a kum telin an tlahniam a, kum 2099 a 61.7% chu 2011 ah 18.2% ah tlai in 2013 ah chuan 7.9% ah a tlahniam a, hei hi hmasawnna nasa tak nia ngaih a ni.