DOWNLOAD OUR APP

Read latest news on your phone
app-store
Mizoramin Bihar hneh, Vijay Hazare Trophy-ah vawi li hnehna chang ve ta
Dec 03, 2023

India rama tual chhung cricket-a inelna sang, Vijay Hazare Trophy 2023-24-ah Mizoram chuan Pathianni khan league stage-ah a vawi khat nan hnehna a chang a, tun hi he inelnaah Mizoramin hnehna a chan vawi lina a ni ve ta.


Mizoram hian Narendra Modi Stadium Ground ‘B’, Moreta, Ahmedabad, Gujarat-ah Bihar chu run 57-in an hneh a, tun season-a vawi khat hnehna channa a ni.


Mizoram hian vaw hmasain over 50 chhungin run 258 siamin mi pariat an thi a. Fast bowler Mohit Jangra chu run siam tam ber niin a tawp thlenga damin run 91 a vaw chhuak a, Agni Chopra (run 48) leh tual chhung player, Jehu Anderson (run 36) ten an thawhhlawk viau bawk.


Bihar hi chak tuma Mizoram run siam an umnaah bul an tan tha tawk lo va, over hmasa berah Jangra chuan an batter pathum a vawm hlum nghal a, thawh leh tumin bei ngial mah se over 43.4-ah run 201 chauh siamin an thi kim a ni.


Mizoram tan hian a vuak lama thawh hlawk tak, Jingra chuan mi pali vawm hlumin Remruatdika Ralte-in mi panga a vawm hlum bawk.


Vijay Hazare Trophy 2023-24-ah hian Mizoram hi khelh rukah an vawi khat chakna a ni a, Group C-ah awmin state (team) pariat awm zingah pasarihna an ni mek a. Khelh khat an la neihah Karnataka chu Thawhlehni hian Gujarat College Cricket Ground ‘A,’ Amehdabad, Gujarat-ah an hmachhawn leh dawn a. Preliminary quarterfinal lut turin an tan kawng a inhawng tawh lo.


Kum 1992-a association, Cricket Association of Mizoram (CAM) din chauh leh kum 2019-a Board of Control for Cricket in India (BCCI) hnuaia inziak lut ve chauh, Mizoram hi Vijay Hazare Trophy-a a inlan vawi rukna chauh a ni a. Tun hmaa a lo inlan tawhnaah vawi thum lai hnehna a lo chang tawh zawk.


A inlan hmasak ber, 2018-19 season khan Plate Group-ah awmin Sikkim chu run 42-a hnehin he inelnaa hnehna a chan hmasak ber a ni.


2019–20 khan Plate Group-ah Arunachal Pradesh chu wicket sarihin a hneh a. 2021–22 khan Plate Group-ah bawk awm lehin league stage-ah vawi hnih hnehna a chang a, Bihar laka wicket sariha a chak hnuah Arunachal Pradesh chu wicket ngain a hneh leh bawk.


Vijay Hazare Trophy hi Ranji One-Day Trophy tia sawi mai thin niin over bituk awm (limited over)-a BCCI hnuaia inelna sang, List A an tih zinga mi a ni a, Ranji Trophy-a inlan thei state leh union territory team inlanna thin a ni.


Kum 1993–94 season atanga khelh tan niin a tirah zonal level-a khelh thin chu 2002–03 atang khan tuna a kalhmang ang hian khelh a ni ta a. Tamil Nadu chu vawi nga champion tawhin champion zing ber an ni mek.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh