India rama over khelh tur zat bituk awm (limited over)-a cricket inelna sang ber, Deodhar Trophy-ah Jehu Anderson chu Mizoram atanga inlan hmasa ber a ni ta a, North East Zone tan run 24 siamin West Zone lakah chakpui zo lo mah se Mizoram cricket tan chhinchhiahtlak a ni.

Board of Control for Cricket in India (BCCI) hnuaia zone parukte an inelna, Deodhar Trophy 2023-ah hian India hmarchhak pum aiawha khel tur hian Chhinga Veng Cricket Club wicketkeeper/batsman Jehu-a hi player 15 thlan chhuah zingah telin Thawhtanni khan a vawi khat nan an inkhel.

Cricket Association of Puducherry (CAP) Ground 2-a an match hmasa berah hian West Zone hmachhawnin a wicket kuain North East Zone an chak lo va. Mizoram batsman hi pathumna (No. 3)-ah lutin ball 41 a hmachhawnah four runs vawi hnih a vaw chhuak hman a, Shams Mulani-a ball vawm vaw fuh tawk lovin Parth Bhut chuan a dawng a, a thi.

West Zone hi thum vawrah chakin vawm hmasak an thlang a, an tifuh hle a. North East hi over 47-ah vawm hlum vekin run 207 chauh an siamtir a. An vuak ve hnuah hahdam takin, over 25.1 lekah mi pakhat chauh thi hmanin an um pha a ni.

Deodhar Trophy chu eng nge?
Kum 23 mi, Dawrpui Vengthar tlangval, Jehu-a inlanna, Devdhar Trophy ti pawha an sawi thin tournament hi India-a List A cricket tournament a ni a, tournament san dan indawta a sang ber (List A) tihna a ni a. D. B. Deodhar (Grand Old Man of Indian cricket) hming chawia a hming vuah niin over 50-a khelh thin a ni.

A khelh dan hmang hi thlak kual fo a ni a, kum 1973-74 season atanga khelh tan a nih atanga 2014-15 thleng khan BCCI hnuaia zone hrang hrangte inelna atana hman thin a ni a. Hemi hnuah hian India A, India B leh India C inelna atana hman leh niin a hnuhnung ber, 2019-20 khan India B an champion a ni.

Mizoram batsman Jehu-a inlanna, Deodhar Trophy 2023 hi a khelh dan tidanglam leh hretin zone hrang hrangte inelna atan hman a ni leh a, Thawhtanniah tanin August 4, 2023 chhunga khelh tura ruahman a ni a, kum 2014 hnua zone inelna atana hman leh hmasak berna tur a ni.

BCCI hnuaia zone paruk - Central, East, North, North East, South leh West Zone te an inel dawn tihna a. Jehu-a leh a thiante hian zone tin hi an inkhel kual chhuak vek ang a, a sang pahnihin final an khel dawn a ni.

Kumina a thlengtu, Puducherry-a khelmual pathumah ni khatah round khat zel an khel dawn a. July 24, 26, 28, 30 leh August 1-ah inkhelin heta a sang pahnihte hian August 4-ah final an khel ang.

Mizoramin hmarchhak tan mi pathum thawh
Cricket Association of Mizoram (CAM) chuan kumin Deodhar Trophy-ah hian mi pathum a thawh chhuak a. Jehu-a bakah hian Vikash Kumar, Electric Veng chu stand by-ah a tel a. North East Zone team manager atan CAM-a Men’s Selection Committee chairman ni lai, Raj Kumar Joshi chu a tel bawk a ni.

July 17 khan an khelhna hmun, Puducherry hi panin an camp nghal a, Thawhtanni atangin intihsiakna an khel tan ta a ni.

Nilaini hian CAP Siechem Ground-ah East Zone an hmachhawn leh ang a. Zirtawpniah South Zone, Pathianniah Central Zone leh a tawp ber, karleh Thawhlehniah North Zone an hmachhawn leh ang a. An inkhelh kuala a sang pahniha an tel phak chuan August 4 hian final an khel ang.