Puducherry-a 48th Sub Junior National Basketball Championship khelh mekah champion lai, Mizoram chuan final an lut ta a, group stage-a an hneh tawh, Uttar Pradesh nen Nilaini tlai hian an inhmachhawn ang.

Final lut tur hian Mizoram hian nikum final-a an lo hneh tawh, Haryana chu 69-40-in an hneh nawn a ni.

Semifinal-ah an khelh dan chungchangah head coach Marc Lalthlamuana Sailo (Tetea) chuan an naute chu an khelh hmasak lam aiin an shooting a tha a, “Kan khelh tawha 3 points kan vawm luh tam ber tum pawh a ni,” a ti.

A tawp lama an khel dul deuh erawh an inruahman ang a nih thu a sawi a, “Final kan khelh lehnghal mai dawn avangin kan indah tha a, inhliam pawh a hlauhawm a, kan khel pawh a dul ta deuh a ni,” a ti.

Mizoram rawlthar rualte hian inelna bul tan atangin hnehna an la chang vek a. Group stage-a an tumpui hneh vek hnuah knockt out stage lut zinga pawh a titha ber an nih avangin pre-quarterfinal pawh khelh hah ngai lovin quarterfinal an lut a, hetah pawh harsatna an tawk chuang lo.

Quarterfinal-ah hian Jharkhand rawlthar rualte lakah player mal fak bik tur pawh awm lovin team game tha tak khelin 72-30-in an sawp leh a, harsa lo takin semifinal an lut a ni.

Champion lai hian final hi Nilaini tlai dar 4:30-ah Uttar Pradesh nen an khel dawn a, an champion leh ngei an inbeisei tih coach Tetea chuan a sawi.

“Game chu sawi lawk theih a ni lo va, ‘Kan huphurh lo,’ han tih ngawt chu a dik lo vang a; mahse, hneh ngei erawh kan inbeisei,” a ti a. An hneh tawh zingah an sawp loh ber kha an ni a, fimkhur a ngai a, insiam thatna tur pawh an nei nual tih a sawi.

Zarkawt tlangval Tetea chuan, “Keini aiin an sang a, feet ruk chuang pawh player pathum/pali lai an nei a, rebound lak pawh kan harsat a, insiam thatna tur kan nei nual a ni,” a ti.

Mizoram hian group stage-ah khan Uttar Pradesh hi 74-63-in an lo hneh tawh a, Maharashtra leh Kerala an sawp ang erawh chuan an sawp thei lo va; quarterfinal leh semifinal-a an tumpuite an sawp angin an sawp thei lo bawk.

Uttar Pradesh hian final lut tur hian semifinal-ah Madhya Pradesh chu 53-51-in an hneh hram a ni.

Ningania Puducherry-a inelna tanah hian a tir lamah Mizoram player 12 zingah damsam lo an awm nual a. An khelh hmasak bera Maharashtra an hmachhawn tum phei chuan dan pangngaia player 10 tal inkhel thei awm turah pariat chauh an awm a, harsatna an nei zui tawh lo thung.

Sub Junior National Basketball Championship hi Basketball Federation of India (BFI)-in state hrang hranga kum 14 hnuai lam, hmeichhia leh mipa inelna atana a buatsaih thin a ni a. Kuminah hian Puducherry-in thlengin Mizoram hian mipa team a tir a. Mipaah team 27 inlanin hmeichhiaah 25 an inlan thung.

MIZORAM TEAM:
Player:
1. Samuel Vanlalpeka, Kulikawn West
2. B Lalruattluanga, Tuikual South
3. Emmanuel Lalpekhlua, Republic Veng
4. Stephen C Lalhruaitluanga, Aizawl Venglai
5. Jacob C Vanlalruatdika, Khatla South
6. Ronie Vanlalawmpuia, Bungkawn
7. Joel Lalbiakhlua, Khatla South
8. K Lalsangzela, Zarkawt
9. PC Lalruatfela, Dawrpui Vengthar
10. Reagan Zohmingsanga, Mission Veng
11. Lalrinchhana, Kulikawn West
12. C Lalfakzuala, ITI Veng

Manager: Raymond Lalengkima, Khatla South
Head coach: Marc Lalthlamuana Sailo, Zarkawt
Assistant coach: Z.D Denghmingliana, Kanan veng