Aizawl: Mizoram Governor thar atan Kerala state-a BJP president ni lai Kummanam Rajasekharan (66) chu ruat a ni a, ruat anihna hi Zirtawpni khan tihchhuah niin May 28, 2018-a term hmang zo tur, Lt. Gen. Nirbhay Sharma a rawn thlak ang. Mizoram Governor atana ruat thar, Kummanam Rajasekharan hian CMS College, Kottayam atanga B.Sc (Botany) a zawh hnuah post graduate diploma in journalism a zo leh a, 1974 ah Deepika chanchinbuah sub-editor niin, chanchinbu dang pathum vela a thawh kual leh hnuah 1976-ah journalist hna chu bânsanin, Food Corporation of India ah a thawk ta a. Vishwa Hindu Parishad-ah telin, kum 1979-ah VHP-ah hian Kottayam District Secretary a ni ta a, 1981-ah VHP State Joint Secretary-ah a kai chho a ni. FCI-a a hna chu kum 1987-ah a bânsan a, Rashtriya Swayamsevak Sangh (RSS)-ah a inhmang chho ta a ni. December 23, 1952-a piang, Kummanam Rajasekharan hi December 18, 2015 atang khan Kerala State BJP President a ni a, a kaihhruaina hnuaiah hian BJP chuan kum 2016 khan Kerala-ah hian MLA seat 1 (khat) an la a, bial 7 ah pahnihna an ni a. Amah pawh a dinna bialah 2-na a ni a, May 28 Thawhtanni hian Kerala Assembly bial pakhata by-election neih tur an hmachhawn mek laiin, kumina Assembly inthlanpui nei tur Mizoram Governor atan  nimin khan ruat a ni ta a ni. Mizoram Larsap ni lai Lt. Gen. Nirbhay Sharma hi May 26, 2015 khan Mizoram Larsap 17-na a tan lakluh a ni a. Khatih hunlaia Gauhati High Court judge, Pu T.Vaiphei chuan Raj Bhavan Durbar Hall-ah rinawmna thu tiamtirin a lalut a ni. Mizoram Larsap thar ruat rual hian Odisha Larsap atan Prof. Ganeshi Lal pawh ruat nghal a ni a, ani hian kumin March thlaa Odhisa Larsap atanga chawl Nagaland Chief Minister hlui SC Jamir a hmun ruak a luahkhat dawn a ni.