ZALEN, Sept. 21, 2024: Mizoram Volleyball Association (MVA)-in a buatsaih, Referee Clinic & Examination chu Zirtawpni tlai khan result a puang a, exam beitu mi 26-te an tling vek.

Hotel Chhungte International, Electric Venga state referee exam result puan certificate hlanna hun hi an pawl president, Dr. Lalmalsawma Nghaka’n a hmanpui.

Dr. Mala chuan referee-a tling thar leh an neih sate fuihin an tournament neihte chu TV emaw, Youtube emaw kaltlanga live telecast a nih thin avangin an tihsual leh tih dik loh a lang hma a, tan lehzual a ngai tih a sawi a. “Player-te zahtlaka in nungchang in fimkhur a, eizawnna satliah chauh a ni lo tih hre turin ka duh che u a ni,” a ti.

State Referee-te chu national referee nih theihna remchang an nei tha tih sawiin “Inthlahdah lovin tun aia nasa zawkin lo inbuatsaih deuh deuh zel ang che u,” a ti bawk.

Referee Clinic & Examination hi Nilaini khan Tuikual Indoor Stadium, Tuikual North-ah tan niin theory, practical leh viva hmanga kalpui a ni.

State referee tling tharte hi R.K. Hmingthanga, Joint Secretary, MVA-in certificate a hlan a. Top-5 te chu MVA president-in Rs. 2,000 theuh a pe bawk.

He hun hi Donald Lalthanmawia Khawlhring, Vice President, MVA-in a kaihruai a. Henry MS Dawnga, Secretary, Technical Committee-in report a pe a. Resource person aiawhin Lalduhawma Hnamte, National Referee-in thu a sawi bawk.