ZALEN June 09, 2026 : State Transport Authority (STA) chuan thuchhuah siamin Mizotaxi-ah hun tiam chhunga mipui mamawh khawp lirthei in-register an awm loh chuan, a ṭul angin 'Mizotaxi' hnuaia tlan tur permit hi pek belh a nih tur thu a tarlang.

Aizawl khawpui chhunga service lai Two-Wheeler Taxi, Four-Wheeler Taxi, leh Auto-Rickshaw te chu June 2026 chhungin Mizotaxi Office, DTO (L.A) Office hnuai, Transport Complex, Chaltlangah registration tifel vek turin an ngen a, In-register tur hian motor document, Driving Licence, leh Voters' ID te ken tel tur an ti.

Mizotaxi hnuaia in register-te tana registration fee hmasa chu thuneitute remtihnain motor pakhatah Rs. 500/- ah siamrem a ni a, fee hi motor service hun chhung atan a nih tawh avangin a bak pek leh a ngaih tawh loh tur thu STA thuchhuah chuan a tarlang.

Tarlan tawh angin Transport department chuan taxi fare langtlang zawk a awm theih nan taxi ho hman tur phone application a siam a. Hei hi Mizoram Transformation Movement (MTM) chuan an duh lo a, an duhdan sawrkar hnenah ngenna an lo thehlut tawh a ni.