Ruata Zote-

Tun hnai khawvela Mizote thil buanah chuan nikum, 2020 March thla vel atanga hripui Covid-19 hi buan hautak berte zinga mi a ni. India ramah chuan a buan hneh teuh ber leh ti tha ber pawl state kan ni chho a; nimahsela, second wave lo thawk leh chuan min lehthal leh titih a nih hi. 

Hri len hmaa kan tihphung pangngai dik leh tha awm chhun te chu thiahsak kan ni a. Chutih rualin ar talh dan chi khat chauh a awm lo tih ang deuhin, kan tih thin dan ang ni lo deuhva thil tih dante kan zir pah zel bawk a. Hripui a lo kian hnua kalphung tha zawkte pawh kan chhar chhuah phah chuan a lawmawm hle dawn a ni. Kan biak in ropui, man tam em emte pawh an ding tawl reng mai chu a ni a, zaithiam leh thusawi thiamin an program an cancel vek a ngai rei ta hle anih hi. 

Hripui lo lut lo turin a dai theuin kan tawngtai a, MKHC bul tumin tawngtainate pawh kan nei a. Kan duh ang leh kan dil ang chiah chiaha thil a awm kher loh chung pawha Pathian rin zelna neih hi rinna ropui zawk chu a ni. Miin damna a dil a, a dam chuang lo va. “I ring tawk lo a nih chu,” tih zel tur chu a ni bik lo ang chu, rinna chu thuawihna nen a kal dun tur a ni. A tawpna a tan chuan ‘I thu ang zelin ka chungah thleng rawh se’ tih nun neih erawh a pawimawh ber a ni. 

Thil lo thleng hi mihring chuan a chhan kan zawng thin a, Pathian chuan a ‘rah’ a en zawk thin. Joba tuarnaah pawh khan a chhan an zawng a, an beidawngin boruak chhia a siam a; nimahsela, a tuarna ‘rah’ erawh chu a thlum hle si. “Benga hriatna mai zawngin ka lo hre thin che a, tunah chuan ka hmu ta che. Chuvang tak chuan ka inten a, vut leh vaivuta thuin ka sim ta,” tih kha a rah chu a ni. Zirtirte pawh khan pian tirh ata mitdel mitdel chhan an zawt a, Isuan a rah zawk a hrilh. “Hemi hian a tisual lo, a nu leh a pain an tisual hek lo, Pathian hnathawh a chunga a lanna tur a nih zawk hi,” a ti daih a nih kha.

Biak inah kan inkhawm thei lo a; nimahsela, kan inkhawm chhan ber kha Zoom leh video conferencing application hmang tangkaiin han siam mah ila, chuti teh luain kan hlut leh lem hlei lo a. Hei hian inkhawm kan uar em em hi chhan dang a nei em ni tih a ngaihtuah theih. Pathian thua tuihalna leh Pathian chibai buk tak tak aiin, intawh khawm (social gathering) te, kan incheina pho lanna leh thil dangte hi a lo ni zawk em? Nge biak in building hrim hrim hi kan lo pathian viau tawh zawk?

Covid-19 hian kohhran hi a beih nasat pawl tak a ni awm e, eng emaw zawng chuan a Setana riau tite pawh an awm, Mizoramah phei chuan a kai hmasa ber pawh pastor a ni. Josepha pawh kha Midian sumdawngte hnenah an hralh a; nimahsela, Pathianin a unaute hmaa a lo tirh a nih thu kan hriat kha. Keinin vanduainaah kan ruat, a hmangaihna lantirtu tih hla ang khan.

Bible-in min zirtir leh phut chu hmangaihna te, rinawmna te leh dikna te an ni. Mahse, Bible-in a sawi tam loh zawk inkhawm te, hnatlan leh kohhran activity hrang hrangte a nasa tak a inhmante hi kristian tha teh nan kan hmang hlauh a, Covid-19 avangin chungte chu kan ti thei ta si lote hi a lawmawm phian zawk te pawhin a hriat. 

Aw le,  sawi tur dang tam tak pawh a la awm ang, Covid-19 hi inbawh behtir mai lo ila, hmasawnna kawng thar min zawhtirtu lo ni zawk se. A rah chhuah leh Pathian hnathawh lo lang turte hi fimkhur tak chungin i buan ve ngar ngar ngawt mai ang u.