- Ruata Sailo -

Buana hmain kan kherh rei viau tawhin a lang a, ‘tunah chuan loh theih loh-in kan pawm chilh ta,’ te han ti ila, tu huat thu mah kan sawi lo ang chu maw? Keuh thlu mai thei pawh ni ila, bawhbehna lai tur berah pawh kan la chiang chiah loin, lungrualna tak ramri pawh kan la nei loin a hriat. Chutihlaiin boundary committee atanga lo in-withdraw leh tawh thawmte pawh hriat a ni leh ta. Boruak sahulh a reh a, buhpawl hal ang maiin mipui lam pawhin kan theihnghilh ve leh zui mai niin a lang tan.  

Chhim lam kawtchhuah a la ni hman bawk si lo, kan dinhmun hi a lak lawh rih khawp mai. KMMTTP-te hi peih hman tawh chu ni se, kan buanna tha pawh a fei thei deuh tur hi a nia. He hmasawnna kawngpuiin Zofate min chil pawh tak tak hmain, engtia lo hmachhawn tur ngr ni ang tih hi ramri aimahin a pawimawh zawk bawk si. Tanhmun kan siam rem hmain, kan khingpuiten min rawn bawhbet mai ang tih a hlauhawm e. Aitlang phei chu, kan chân hlen mai ang tih hlauhawm dinhmunah a ding mek niin a lang.

Ramri chungchang hi mipuiin kan ngaihven ang reng hle mai a, thil lawmawm tak a ni. Ngaihdan inang lo deuh hlekte chu lo awm bawk mah se, party leh kohhran thlengin, zai khatah min luantir thei titih a, Lalram chanchin tha hi, min phuarkhawmtu ni zawk phei sela chuan, kan buanpuite pawh hneh mai ni loin, kan lamtangah kan dah thei ngei zawk ang. Nimahsela, he ram hmangaihna (party) leh, Lalram chanchin tha hrilhna (kohhran) te hian min thendarh nasain, mahni leh mahni kan inbuan tawk viau niin a lang bawk si. Ram chhugah hian ramri kan kham nasa em em a, ramri ringawt a tanrual a, ram chhunga kan indo leh si chuan ram ropui tak kan thleng thei lo ang.

Milem biate nena ramri kan intihbuai lai tak a, rilrua thil lo awm chu, keimahni ngei hi milem bia kan ni ve tho em? tih hi a ni. Kan Bible-in milem biakna a tih kha eng nge ni le? A tak thleng si loa a káwr ringawt buaipuina hi hriat loh hlana milem biakna chi khat a lo ni ve thei reng mai. Nimahsela, a káwr tel lo chuan a tak hlutna kha a tlahniam ve thei tho bawk si. Biak in ngah leh neih that-ah hi chuan mahni tawkah khawvelah a ber kan nih a rinawm; mahse, biak in hi chu a kawr chauh a ni si a. Ramri buan ai chuan, ram chhung buan nat deuh hi chu a pawimawh zawk mahin a hriat tho tho mai. Ramrî ringawta țanruala, ram chhúnga indo leh si hi chu HNAM BO culture lek a ni.

Ramri buan chungchang sawi hi chuan kan buan tel ngei ngei ngai a awm a,  Assam sorkar hian kan ngaihdan leh kan duh dan hi min remtihpuiin kan kutah dah hmiah ta mai se, hengte hi engtin nge kan buan ang?

    1. He ram chhungah hian mi, nuai eng emaw zat an awm ngheh tawh thu an sawi a. Chu’ng mite chu engtin nge kan tih ang? Kan hnawt chhuak ang nge, kan mi leh sa-ah kan pawm ang?

    2. Hnawh chhuah kan tum a nih chuan, an awmna turte  kan ngaihtuahsak a ngai ang a; chu chu kan tih theih niin a lang lo. Hnawh chhuah luih kan tum a nih chuan Human Dignity te, Human Rights te, Amnesty International te chu kan kawng daltu an ni nghal ang a. “Physical possession is ninety percent(90%) possession”, International Law-ina a tih chu kan tânmu lian ber a ni bawk ang.

    3.   Kan mi leh saa kan pawm a nih chuan tuna kan MLA nei theih zata chhutin, a tlem berah MLA 20 emaw an rawn nei thei dawn tihna a ni ang a; chu chu kan remti ang em? Chakma pakhat pawh enghelh viaute hian a let sawmhnih (20)-a tam chu engtin nge kan pawmzam theih ang?

    4. Kan buaina hi a ler ațanga thil chin fel a harsatzia rawn tilang chiangtu a ni leh mai lo maw?

A ram leh a felna kan zawn hmasak thiam loh chuan, min pêk belhchhah tur hi kan chhiatpui thei. Pawl/party leh kohhran tam tak kan awmte pawh hi a leh lam ngaihtuah chuan duh luat vang a tih theih awm e. Duh luat vanga dai buak a awl si a, dai buak phawta harh chhuah leh nan chuan, phengphehlepa khua a tlai zo tawh ang. Tuna loh theih loha kan pawmchilh mek hi, thlah mai loin buan char char tawh ila. Chakna thahrui nei turin, ram leh hnam leh sakhuaah harh thar zel bawk ila.  

Ram leh hnam leh lal thuthlungte hi lungthu anga inchen thapin dah lo ila, ram leh hnam thuthlung aiin, lal thuthlung chu a chungnungin a khai chhuaktu tur a ni. He ramri pawh hi Pathian lalram chanchin tha vei chung leh, a ram leh a felna zawng hmasa chunga kan buan hi a pawimawh ber a ni. Tichuan, ramri chu kan buan chhuak mai ang.