ZALEN September 23, 2025 : Railways hotute chuan Mizoram mipui ten Railways hmun neitu taka an enkawl danah te, an mi leh sa te chungah that an chhuah thin danah mizo mipuite chungah lawmthu an sawi.

BJP Mizoram hruaitute chuan railways dinhmun chungchang an zawhnaah leh tun hnaia Rel station an tihfai tumin Sairang khua leh a chhevel bakah rel a chuang tura kal ten rel chhung leh rel station leh a vel an enkawl dan chu lawmawm an tih thu Railways hian an lo hrilh an ti.

Railways chuan Mizoten neitu taka an hmunhma te an hlutpui chu nuam an tih bakah lawmawm an ti a, Mizote chungah lawmthu hrilh sak turin an ngen tih BJP hruaitute hian vawiina Aizawl Press Club-a chanchinthar thehdarhtute an hmachhawn naah an sawi.

Rel-a bungraw phurh man hi a tlawm hle BJP Mizoram chuan an ti a, tun dinhmunah thil phurh man hi Guwahati atangin Kg-ah Cheng 2 a ni a, Delhi atanga phurh man hi Cheng 3 a ni thung a, Lirthei pangai chuan tunah hian Guwahati atanga Kg khat phurh man hi Cheng 7 niin Delhi atanga phurh man hi Cheng 20 a ni, an ti. Hetiang anih vang hian thil phurh man a intlawm hleih em em mai bakah a Rel chuan a thleng hma bawk a ni an ti. A rate hi ennawn a nih hunah chuan hei ai hian a tlawm a rinawm an ti a, hei ai hi chuan a sang dawn lo niin Railways lam chuan BJP hruaitute hi an hrilh bawk.

Thlai thar leh frozen food lam phurna chi Refrigirated wagon pawh a tul dan a zira hman theih reng a ni an ti a, mahse, tunah chuan hmanna tur a la awm lo niin a lan thu an sawi a, hemi hmang tur chuan a lo berh Ton 28 phurh tur neih a tul tih BJP hruaitute hi railways hian an hrilh, tih an sawi.