• Lalchhandama Colney
• Communist ramah te, Hindu leh Muslim ho ramah te chuan Kristian nih hi a nuam mang lo, a nuam mang lo mai pawh ni lovin thenkhatah phei chuan lu chhum, ban chhum inhuam a ngai a ni. Keini ramah chuan a nuam khawp a, zu in mi, ngaihsak vak lote phei chu ngaih khat deuhah kan ngai a, kan hmu sang teh chiam ngai lo zawk a ni. Hetih vang hi nge ni dawn kan Kristian dan hi thenkhat chu a dal hle, kan ti ve mai mai niin a hriat. Eng pawh nise, Mizoten kan changkan phah hle a, mingo, khawvela thiltithei leh chak berte sakhua lo ni nen, kan khaw hawi pawh a zau phah hle a ni. Kan hriat theuh angin India ram chu Hindu ram a ni a, khu lam South India leh hmarchhak thenkhatah tih loh chuan Kristian kan awm ve mang lo a ni. India ram mipui maktaduai eng emaw zahah hian Kristian chu chhiar tham lek kan awm ve a ni.

Kohhran Angah: Kan hre theuh ang a, Mizote chu kan Kristian tha hle mai. Chawlhni phei chuan dawr zawng zawng a inkhar a, pisa leh market-te, kan khawlaite chu a reh ruih thin mai a ni. Inkhawm dar, veng tinah khaw tinah a ri chuah chuah a, inkhawm turin nalh taka incheiin kan kal dul dul mai thin a ni. Kan vawi khat thawhlawm pawh a tam thei hle a, kohhran kum khat budget-te phei chu tam ve thei tak a ni. Rawngbawlna ki peng hrang hrangte kan nei thluah a, chungah chuan veng chhung mite chu kan inhmang deuh vek a ni. Missionary-te pawh kan tir chhuak nasa, kohhran thenkhat phei chuan za chuang chuang an chawm a ni. Heng zawng zawngte han thlir hi chuan Zoram Kristiante chu kan tha hle mai, ram dang miten min fak thinnate pawh hi a tak tak a ni ngei ang. Bible zirna school, college-te pawh kan nei nual, hengah hian kum tin zir chhuak an awm reng a ni. Pastor turte pawh kohhranin a duh ang zan duhthlan tur a nei thei tawh a ni.

A Thleng Thui Lo: Mizote hetiang tak hian kan lo Kristian tha a, a lawmawm hle mai. Mahse, biak in kan pel a, dawt kan sawi leh mai thin, mi kan rel leh thin. Pawisa hmuh theihna a nih dawn phawt chuan tihhreh hi kan nei mang lo thin. Thenkhat chuan pulpit-ah thu kan sawi dum dum a; mahse, a tukah a ngai tê-in kan hlep ru leh mai thin. Office thil leh bungruate pawh ngaihtha takin kan hawn hmiah hmiah mai thin. Mi hmuh phak lovah chuan nulate pawh kan rim ve tho mai, tun hma vaiho titi an sawi, tak tak nge ni -”Mizoram chu Pathian lo kal dawn ti reng a; mahse, Kolkatta kan thleng a, lo kal leh dawn si lo,” an ti. Nia, Mizote hi rawngbawltu tha tak tak emaw tihte pawh hi tun hma kha chuan, zu in ve ta mai, hotel vela hmeichhe inzuar kawp ve ta mai maite hi kan awm thin, an ti. Kan Pathian thu ngaihthlak thin leh sawi thin te hian kan rilru tak tak a khawih lem lo, kan hre rei vak thin lo niin a hmuh theih.

Eng A Ti Nge? Pathian thute kan sawi kan sawi a, kan ngaithla bawk a; mahse, a tak tak ram hmuh tur a awm leh si thin lo, enga ti nge? Hman deuha an sawi pakhat chu, “Mizote chu Pathian thu an sawi an sawi a, an awmna hmun apiangah,” an ti a. Sap pa pakhat chuan, “Chu, an va intibuai zo vek mai awm ve?” a ti a. An chhannaah chuan, “A tua mah kha an inawihsak chuang lo va,” an ti e, an ti. Awle, zirbingna lo nei tawh Baptist lam Pathian thu thiam pakhat chuan, “Sapho khan kan culture tel lovin, an mahni tih dan zul zuiin min zirtir thin a, chu chu han tha ve viau mah se, kan thinlung a fan thei tak tak thin lo a ni,” a ti. “Sap culture zul zuiin thu kan dawng a, kan Mizo zia kha a tel ve mang loh avangin a tla na thei tak tak lo a ni,” a tihna deuh a nih hmel. Thenkhat chuan kan hnam la naupan vangah pawh an puh ve bawk a, eng pawh nise, keima rin dan ve mai maiah chuan tawngtai leh Bible chhiar kan thlahdah thin vang a nih ka ring deuh.

Kan pipute hun lai, Kristian kan nih hma, hnam rinawm leh taima kan nih thinzia te, tun hnuah erawh hnam dangte chawmhlawm, kum chanve ei takngial pawh buh leh bal thar chhuak zo lo, kuttlinglova pawisa thawh chhuah pawh pawiti lo, duh zawk kan lo ni ta zawk tlat mai. Kristian kan lo nih takna chuan min tichhe zo ta em ni, ni ang le? Kan rilru sukthlek dan (moral)?chu han inbihchiang ta hlawm ila, a hring a hranin ruk kan ru lo na a, kan kar a hla vak chuangin a lang lo. Kan Kristianna chu han dem ta viau ila eng eng kan an ang aw? Nia, a chin fel dan tur tak tak hi awm thei pawhin a lang lo.Bible-ah chuan, “..buh lem leh buh tak chu lo to za hrih mai mai rawh se,” tih kan hmu ang. Ram dangah pawh an lo ni ve tho a nih hmel, chuvang chuan Mizote zingah pawh Kristian tha tak tak leh ti ve mai mai kan tam a ni ngei ang. Mizote, tih tak takna rilru pu theuh thei turin tan ila sauh sauh ang u.